ATƏT-in yeni rəhbər funksionerləri müəyyənləşib
Vyana, 4 dekabr, AZƏRTAC
ATƏT-in dörd mühüm rəhbər vəzifəsinə (ATƏT-in Baş katibi, Demokratik İnstitutlar və İnsan Haqları Ofisinin rəhbəri, ATƏT-in media azadlığı üzrə nümayəndəsi və Milli azlıqlar üzrə xüsusi nümayəndə) təyinatlar təsdiqlənib.
AZƏRTAC xəbər verir ki, iyuldan bəri boş qalan rəhbər postlar üzrə təyinatlar Nazirlər Şurasının toplantısı çərçivəsində baş tutub. Alman diplomat Helqa Şmid ATƏT-in Baş katibi vəzifəsinə seçilib. 59 yaşlı təcrübəli diplomat son olaraq Avropa İttifaqının Xarici Siyasət Xidmətinə rəhbərlik edib və Aİ-nin xarici siyasəti və diplomatiyasında əsas fiqurlardan biri olub. Onun, eyni zamanda, 2015-ci ildə İranın nüvə proqramından dinc məqsədlər üçün istifadəyə dair sazişin hazırlanması və qəbulunda da mühüm rol oynadığı bildirilir.
Portuqaliya hökumətinin xarici işlər üzrə dövlət katibi Tereza Ribeyro ATƏT-in Media azadlığı üzrə xüsusi nümayəndəsi, İtaliya parlamentinin keçmiş üzvü Matteo Mekaççi Demokratik İnstitutlar və İnsan Haqları Ofisinin rəhbəri və Qazaxıstanın keçmiş xarici işlər naziri Kayrat Abdrahmanov isə ATƏT-in Milli azlıqlar üzrə xüsusi nümayəndəsi seçilib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
