İDMAN
ATLETİKA ÜZRƏ FEDERASİYA KUBOKU YARIŞLARININQALİBLƏRİ MƏLUMDUR
Qadın və kişilərin 100 və 200 metr məsafəyə qaçışında Bakı idmançıları Yana Kalpakova və Ruslan Abbasov, 400 metr məsafəyə qaçışında isə Tatyana Nedorezova və İbrahim Əhmədov birinci yer tutmuşlar.
Namiq Əsədov isə 800 və 1500 metr məsafəni hamıdan tez qət etmişdir. Qadınlardan bu məsafələr üzrə qaliblər Alfiya Nosova və Səfurə Seyidova olmuşlar. Kişi və qadınların 5000 min metr məsafəyə yarışında Fikrət Qafarov (Bakı) və Şəbnəm Əhmədova (Astara) fəxri kürsünün ən yüksək pilləsinə qalxmışlar.
Qadınlar arasında uzunluğa tullanma yarışlarında 5,37 metr nəticə ilə Leyla Paşayeva qalib gəlmişdir. Bu növ üzrə kişilərin mübarizəsində isə birinci yerə Aqil Paşayev (6,78 metr) layiq görülmüşdür. Maraqlıdır ki, idmançı hündürlüyə tullanma yarışlarında da hamıdan yüksək nəticə göstərmişdir (1,90 sm).
Bundan əlavə atletlər yadro itələmə, üç təkanla tullanma, lövhə atma, nizəatma yarışlarında da mübarizə aparmışlar.