Avropa Gənclər Yay Olimpiya Festivalının könüllüləri xeyriyyə yarmarkası keçiriblər
Bakı, 5 iyul, AZƏRTAC
İyulun 5-də Fəvvarələr meydanında XV Avropa Gənclər Yay Olimpiya Festivalının könüllüləri tərəfindən xeyriyyə yarmarkası təşkil olunub.
AZƏRTAC xəbər verir ki, tədbir çərçivəsində valideyn himayəsindən məhrum uşaqların əl işlərinin satışı həyata keçirilib. Satışlardan əldə olunan vəsait “Ümid Yeri” Uşaq Sığınacağı Xeyriyyə Cəmiyyətinə verilib.
Yarmarkanın keçirilməsində məqsəd könüllülərin ölkəmizin sosial həyatında fəal iştirak etməsi və imkansız uşaqlara yardım göstərilməsidir.
“Bakı 2019” XV Avropa Gənclər Yay Olimpiya Festivalı könüllülərinin ulduz səfirləri də tədbirdə iştirak ediblər.
İyulun 21-27-də Bakıda keçiriləcək XV Avropa Gənclər Yay Olimpiya Festivalı ilə əlaqədar Azərbaycana 3600-dən çox idmançı və texniki nümayəndə gələcək. Atletlər idmanın on növü - gimnastika, atletika, basketbol, velosiped idmanı, həndbol, cüdo, üzgüçülük, tennis, voleybol və güləş yarışlarında qüvvələrini sınayacaqlar. Festival zamanı 12 idman obyektində 2500-dən çox könüllü fəaliyyət göstərəcək.
Bölmənin digər xəbərləri
