Avropa Komissiyası aparıcı avtomobil istehsalçılarını 875 milyon avro cərimələyib
Bakı, 8 iyul, AZƏRTAC
Avropa Komissiyası dizel mühərrikli avtomobillərin tullantı qazlarının azot oksidindən təmizlənməsi sahəsində gizli sövdələşməyə və Avropa İttifaqında rəqabət qaydalarının pozulmasına görə aparıcı avtomobil istehsalçılarını - “Volkswagen”, “Audi” və “Porsche” brendlərinin daxil olduğu “Volkswagen” qrupunu və “BMW” kompaniyasını 875 milyon avro həcmində cərimələyib.
AZƏRTAC xəbər verir ki, bu barədə Avropa Komissiyasının sədr müavini Marqrete Vestager Brüsseldə keçirilən mətbuat konfransında məlumat verib.
“Kompaniyaların hamısı karteldəki iştirakını etiraf edib və bu problemin həlli üçün çalışır. Onların ən yaxşı texniki qərarların əldə olunmasını təmin edən rəqabəti məhdudlaşdırmaq hüququ yoxdur. Bu, qanunsuzdur, çünki istehlakçıların hüquqları pozulur”, - deyə o bildirib.
Adları çəkilən avtomobil istehsalçıları uyğun texnologiyanın mövcudluğuna baxmayaraq, daha yaxşı təmizləmə sahəsində rəqabətdən yayınmaq üçün beş ildən artıq müddətdə sövdələşmədə olublar.
Marqrete Vestagerin sözlərinə görə, “Volkswagen” formal olaraq ayrı sayılan, lakin ona daxil olan “Audi” və “Porsche” kompaniyaları ilə birlikdə 502,4 milyon avro, BMW isə 372,8 milyon avro cərimələnib. Kartelin mövcudluğu barədə Avropa Komissiyasına ilk məlumat verən və istintaqla əməkdaşlığa başlayan “Daimler” kompaniyası isə 727 milyon avroluq cərimədən toxunulmazlıq alıb.
Bölmənin digər xəbərləri
