Avropa Komissiyası ilə strateji əməkdaşlıq Azərbaycanın güclü mövqeyini bir daha nümayiş etdirir RƏY
Bakı, 3 iyul, AZƏRTAC
Avropa Komissiyasının Prezidenti Ursula Fon der Lyayenin Bakıya səfəri və Azərbaycan Prezidenti İlham Əliyevlə görüşü bir sıra mühüm məqamlarla yadda qaldı. Bu səfər, ilk növbədə, bəzi Avropa institutlarında Azərbaycana qarşı qərəzli mövqelərin müşahidə olunduğu bir dövrə təsadüf etməsi baxımından xüsusi əhəmiyyət daşıyır. Səfər bir daha göstərdi ki, Azərbaycan əməkdaşlıq platformalarına hər zaman açıqdır. Lakin bu əməkdaşlıq qarşılıqlı hörmət, bərabər tərəfdaşlıq və ədalətli münasibət prinsipləri əsasında qurulmalıdır.
Bu sözləri AZƏRTAC-a açıqlamasında “İnformasiya və Sosial Təşəbbüslərə Dəstək” İctimai Birliyinin sədri, siyasi şərhçi Cəsarət Hüseynzadə deyib.
O bildirib ki, bu baxımdan Avropa Komissiyası ilə strateji əməkdaşlıq Azərbaycanın güclü mövqeyini bir daha nümayiş etdirir. Çünki Avropa Komissiyası Avropa İttifaqının 27 üzv dövlətini təmsil edən mühüm institusional qurumlardan biridir. Bu qurumun yanaşması ayrı-ayrı lobbi qruplarının maraqlarını müdafiə edən bəzi parlamentarilərin subyektiv mövqelərindən fərqli olaraq, daha geniş və institusional əməkdaşlıq çərçivəsini əks etdirir.
“Şübhəsiz ki, münasibətlərin və əməkdaşlığın real göstəricisi rəqəmlərdə öz əksini tapır. 2022-ci ildə Avropa İttifaqı Rusiya qazı ilə bağlı çətin vəziyyətlə üzləşəndə Azərbaycana müraciət etdi. Bakı isə həmin dövrdən bu günədək Aİ-yə qaz ixracını 65 faiz artırıb. Daha dəqiq desək, bu gün Azərbaycanın qaz ixracının yarısı Avropa İttifaqına üzv ölkələrin payına düşür və ümumilikdə Aİ-nin 10 ölkəsi Azərbaycan qazının alıcısıdır. Bundan əlavə, Avropa İttifaqının Cənubi Qafqaz ölkələri ilə ticarət dövriyyəsinin 70 faizi Azərbaycanın payına düşür. Bu faktlar Azərbaycanın regionda etibarlı tərəfdaş və mühüm iqtisadi aktor kimi mövqeyini bir daha təsdiqləyir”, - deyə siyasi şərhçi vurğulayıb.
O qeyd edib ki, Azərbaycan üçün prioritet istiqamətlər çoxşaxəlidir. Yaşıl enerji, neft-qaz ixracı, Mərkəzi Asiya ilə Avropa arasında körpü rolunun gücləndirilməsi və regional nəqliyyat dəhlizlərinin inkişafı bu prioritetlər sırasında xüsusi yer tutur. Bu baxımdan, Ursula Fon der Lyayenin səfəri Azərbaycanın artan geosiyasi və iqtisadi əhəmiyyətini bir daha nümayiş etdirdi. Səfərin əsas xüsusiyyətlərindən biri də davamlı sülhün iqtisadi əməkdaşlıqla daha da möhkəmləndirilməsi mesajı oldu. Əslində, iqtisadi münasibətlərin genişlənməsi regionda yeni siyasi arxitekturanın formalaşması deməkdir. Azərbaycan bu istiqamətin strateji xəritəsini hələ illər əvvəl müəyyən edib və ardıcıl şəkildə həyata keçirib.
“İndi əsas məsələ ondan ibarətdir ki, sabit sülh siyasi razılaşmalarla yanaşı, həm də qarşılıqlı etimad mühitinin inkişafı və iqtisadi əlaqələrin dərinləşməsi ilə möhkəmlənməlidir. Bu kontekstdə Avropa İttifaqının “Global Gateway” sərmayə proqramı çərçivəsində Cənubi Qafqazda nəqliyyat, enerji və rəqəmsal bağlantılara 200 milyon avroya qədər qrant ayırmaq niyyəti diqqətəlayiqdir. Bu layihələr sırasında Naxçıvandan keçən dəmir yolu bağlantısı və Bakı Limanının inkişafı kimi istiqamətlər də xüsusi qeyd olunur. Digər vacib məqam isə 20 milyon avro dəyərində sülhü təşviq edən proqramla bağlıdır. Bu proqramın yerli icmaların inkişafı, minatəmizləmə, səhiyyə, bacarıqların artırılması və yerli biznesin dəstəklənməsi kimi sahələrə yönəlməsi mümkündür.
Əlbəttə, Azərbaycan maliyyə məsələlərində hər zaman həssas və praqmatik yanaşma nümayiş etdirir. Hesab edirəm ki, bu rəqəmlər, əslində, Avropanın regiona və xüsusilə Azərbaycana artan marağını göstərir. Ursula Fon der Lyayenin də vurğuladığı kimi, Azərbaycan öz strateji coğrafi mövqeyini artan iqtisadi, siyasi və regional nüfuzu ilə düşünülmüş şəkildə birləşdirir. Bu isə ölkəmizin həm Cənubi Qafqazda, həm də daha geniş Avrasiya məkanında əsas tərəfdaşlardan birinə çevrildiyini bir daha təsdiqləyir”, - deyə Cəsarət Hüseynzadə əlavə edib.
Bölmənin digər xəbərləri
