Avropanın yeraltı anbarlarında qaz ehtiyatları 86 faizə yaxınlaşır
Bakı, 5 avqust, AZƏRTAC
Hazırda Avropanın yeraltı qaz anbarlarında mavi yanacaq ehtiyatlarının həcmi 85,7 faizə çatıb.
AZƏRTAC xəbər verir ki, Gas Infrastructure Europe assosiasiyasının məlumatına görə, avqustun 3-də Avropa İttifaqı ölkələrində anbarlardan qaz götürülməsi 18,5 milyon kubmetr, qaz doldurulması isə 294 milyon kubmetr təşkil edib. Hazırda Avropanın yeraltı anbarlarında 93,2 milyard kubmetr (85,7 faiz) qaz var ki, bu da son beş ilin analoji dövrünün orta göstəricisindən 8,66 faiz çoxdur.
İyul ayında Avropanın elektrik enerjisi istehsalında külək generasiyasının payı 2023-cü ilin ortalarından bəri minimum həddə düşərək 11,56 faiz olub.
Hazırda London ICE birjasında min kubmetr qazın qiyməti təxminən 406 dollardır.
Rusiyanın “Qazprom” kompaniyası Avropaya sutkada 42,3 milyon kubmetr qaz tədarük edir. Müharibəyə baxmayaraq, həmin qaz Ukrayna ərazisindən tranzitlə “köhnə qitə”yə çatdırılır. Bu xətt “Şimal axını” qaz kəmərinin sıradan çıxmasından sonra Rusiya qazının Qərbi və Mərkəzi Avropa ölkələrinə tədarükü üçün yeganə marşrut olaraq qalır.
Həmçinin iyun ayında terminallardan Avropanın qazötürmə sisteminə maye qaz vurulması 2021-ci ilin noyabrından bəri ən aşağı səviyyəyə - maksimum gücün 33 faizinə enib.
Bölmənin digər xəbərləri
