Avstraliya kəşfiyyatının rəhbəri: Ölkədə terror təhlükəsi artıb
Bakı, 5 avqust, AZƏRTAC
Avqustun 5-də Avstraliya hökuməti ölkədə terror təhlükəsini “ehtimal” səviyyəsinə qaldırıb.
AZƏRTAC xarici mediaya istinadla xəbər verir ki, Avstraliyanın yüksək səviyyəli kəşfiyyat rəsmisi bu addımın atılmasını ifrat dini və siyasi ideologiyaların daşıyıcılarının fəallaşması ilə izah edib.
Kəşfiyyat xidmətinin rəhbəri Mayk Burgess bildirib ki, ölkədə labüd hücum əlaməti olmasa da, növbəti 12 ayda zorakılıq təhlükəsi daha da güclənib. O əlavə edib ki, Avstraliyanın təhlükəsizlik mühiti getdikcə daha gərgin, dəyişkən və gözlənilməz hal alır. Mayk Burgess jurnalistlərə deyib: “Siz mənim əvvəlki bəyanatlarımla tanışsınız, casusluq və xarici müdaxilə bizim əsas təhlükəsizlik problemlərimiz olaraq qalır. Siyasi və dini motivli zorakılıq indi casusluq və xarici müdaxilə ilə birləşir və daha güclü təhdidə çevrilir”.
Avstraliya rəsmisi daha çox avstraliyalının radikallaşdığını və ölkədə siyasi qütbləşmədə sıçrayışlarla mübarizə aparıldığını bildirib. Bu ilin əvvəlində 16 yaşlı şübhəli Sidney kilsəsində keçirilən ayin zamanı assuriyalı xristian yepiskopunu bıçaqlayıb. Polisin dediyinə görə, bu, dini motivli terror aktıdır.
Bölmənin digər xəbərləri
