Aytac Şıxəlizadə: Nazim Rzayevin yaradıcılıq yolu musiqiçilər üçün nümunə və istinad nöqtəsidir
Bakı, 12 dekabr, Günel Alıyeva, AZƏRTAC
Əminəm ki, belə böyük ustadlardan sonra gələn musiqiçilər təkcə onların musiqisini deyil, həm də taleyin bütün dönüşləri, tərəddüdləri, qələbələri və sınaqları ilə birlikdə onların həyat yolunu öyrənməyə borcludurlar. Həm gənc, həm də artıq təcrübəli ifaçılarda musiqi dünyasına geniş baxışın olması vacibdir. Bu dünya yalnız şəxsi təcrübədən deyil, bu yolu keçmiş insanların təcrübəsindən formalaşır. Bu mənada dirijor Nazim Rzayevin yaradıcılıq bioqrafiyası özlüyündə nümunə və bələdçidir: onu öyrənmək, əsas kimi götürmək və onun musiqi mədəniyyətimizə verdiyi nailiyyətləri ardıcıl inkişaf etdirmək lazımdır.
AZƏRTAC-ın müxbiri dirijor Nazim Rzayevin 100 illiyinə həsr olunmuş yubiley konsertinin solisti Aytac Şıxəlizadə ilə söhbət edib.
Müsahibimizin sözlərinə görə, vokalçılar daha çox dahi müğənnilərin ənənələrinə müraciət edirlər, lakin Nazim Rzayevlə bağlı onun üçün xüsusilə dəyərli olan maestronun “orkestr vasitəsilə” musiqiyə baxışıdır, yəni düşüncə incəliyi, tembrlərə və səslənməyə münasibəti, partituranın detallarına diqqətidir.
“Əgər konkret danışsaq, mən səhnədə ifa etdiyim romansları onun orkestr üçün necə uyğunlaşdırdığını xüsusi qeyd edərdim. Vokalçı kimi mən artıq hiss edirəm ki, bu, tamamilə başqa bir səviyyədir. Təəssüf ki, bu gün çox az adam belə dərinliklə və belə detallarla orkestr üçün işləmələr edir. Hətta qulaqla belə hiss olunur ki, bu, digər versiyalardan, orkestr üçün digər işləmələrdən nə dərəcədə fərqlənir. Mənim üçün təkcə romansları oxumaq vacib deyil, həm də bu notlarda musiqini orkestr üçün uyğunlaşdırmış və musiqiyə ruhunu qoymuş insanın baxışını eşitmək vacibdir. Bu isə ifaya xüsusi bir daxili dayaq verir”, – deyə o qeyd edib.
Solist, həmçinin vurğulayıb ki, Azərbaycan Dövlət Akademik Filarmoniyasında konsertdə iştirak etmək onun üçün xüsusi əhəmiyyət daşıyır.
“Son səkkiz ildə mən xaricdə təhsil almış və işləmişəm, çox çıxış etmişəm, müxtəlif ölkələrdə, şəhərlərdə, teatrlarda olmuşam. Amma buraya qayıdanda Filarmoniya mənim üçün doğma ev kimidir. Hər dəfə bu səhnəyə çıxanda çox isti emosiyalar keçirirəm. Bəli, biz dünyanın ən böyük səhnələrində çıxış edirik, miqyası və möhtəşəmliyi hiss edirik, lakin burada başqa bir hiss var”, – deyə Aytac Şıxəlizadə vurğulayıb.
Bölmənin digər xəbərləri
