Bakı, 20 dekabr, AZƏRTAC

“Ölkə kubokunun təşkilatçılığı yüksək səviyyədə idi. Buna görə də Azərbaycan Ağırlıqqaldırma Federasiyasına təşəkkürümü bildirirəm”.

Bu sözləri AZƏRTAC-a açıqlamasında ağırlıqqaldırma üzrə Azərbaycan Kubokunda 49 kiloqram çəki dərəcəsində qalib olan Nazilə İsmayılova deyib.

Xanım idmançı yarışın onun üçün rahat keçdiyini bildirib: “Azərbaycan Kuboku çox maraqlı alındı. Özümüzü bu turnirdə rahat hiss etdik. Yarışda iştirak edən digər idmançılarımız da uğurlu mübarizə apardılar. Öz çəkimdə Parisdə keçiriləcək Yay Olimpiya Oyunlarına lisenziya qazanmağa əsas namizədəm. Məqsədim çoxlu xallar yığıb gələn il baş tutacaq yarışda Azərbaycanı layiqincə təmsil etməkdir”.

N. İsmayılova Olimpiya Oyunlarında uğur qazanacaqlarına inandığını söyləyib: “Son iki ildə kişi və qadın ağırlıqqaldıranlarımızın çıxışında inkişaf var. Bunun nəticələrini yarışlarda da görürük. Ümid edirəm ki, hər bir idmançı “Paris-2024”dən medalla qayıdacaq”.