Azərbaycan-Almaniya münasibətləri strateji tərəfdaşlıq səviyyəsinə yüksəlib ŞƏRH
Bakı, 22 iyul, AZƏRTAC
Prezident İlham Əliyevin Almaniyaya rəsmi səfəri hazırda ölkə və dünya mətbuatının diqqətindədir. Səfər Azərbaycan-Almaniya münasibətləri ilə yanaşı, Azərbaycan-Avropa İttifaqı əlaqələrinin də təqdimatı kimi dəyərləndirilir. Prezident İlham Əliyevin Almaniya Federativ Respublikasının Federal Kansleri Fridrix Merts ilə mətbuata bəyanatlarında vurğuladığı kimi, bu il həm Avropa İttifaqı Şurasının Prezidenti Antonio Koşta, həm də Avropa Komissiyasının Prezidenti Ursula Fon der Lyayen Azərbaycana səfər ediblər. Bu səfərlərin böyük siyasi mənası var. Bu, Avropa İttifaqı ilə Azərbaycan arasındakı əlaqələri daha da gücləndirəcək. Almaniya Avropa İttifaqına üzv ölkələr arasında lider olduğu üçün burada, təbii ki, həm Almaniyanın rolu çox böyükdür, eyni zamanda, gələcək əməkdaşlıq üçün Almaniya öz səylərini göstərəcək.
Bu fikirləri AZƏRTAC-a açıqlamasında Milli Məclisin deputatı Malik Həsənov söyləyib. Deputat bildirib ki, Azərbaycan-Almaniya münasibətləri artıq strateji tərəfdaşlıq səviyyəsinə yüksəlib. Bu, tərəflərin qarşılıqlı etimad mühitinin möhkəmləndirilməsi fonunda bütün sahələrdə əməkdaşlığın uğurlu inkişafı istiqamətində atılan real addımlarda öz təsdiqini tapmasının nəticəsidir. Qeyd edək ki, Almaniya Azərbaycanın müstəqilliyini 1992-ci ilin yanvarında tanıyıb. İki ölkə arasında davamlı siyasi dialoq mövcuddur, iqtisadiyyat və humanitar sahələrdə geniş əməkdaşlıq həyata keçirilir. Qarşılıqlı səfərlər münasibətlərdə yeni mərhələnin başlanğıcı olur. Prezident İlham Əliyev mətbuata bəyanatında bildirdi ki, Almaniya Avropa İttifaqının aparıcı ölkəsi kimi Cənubi Qafqazda öz təsirini artırmaqdadır. Azərbaycan-Almaniya əlaqələri təkcə ikitərəfli münasibətlərə yox, bütövlükdə bölgəmizdə əməkdaşlığa, sülhə, əmin-amanlığa töhfə verəcək.
Deputat qeyd edib ki, səfər çərçivəsində Prezident İlham Əliyevin Almaniya Federativ Respublikasının Prezidenti Frank-Valter Ştaynmayer, həmçinin Almaniyanın Federal Kansleri Fridrix Merts ilə təkbətək və geniş tərkibdə görüşlərində iki ölkənin münasibətlərinin gələcəyi ilə bağlı səsləndirilən fikirlər, təbii ki, ötən dövr ərzində atılan addımlara, möhkəm təmələ əsaslanır: “Prezident İlham Əliyevin bu səfərinin ikitərəfli əməkdaşlığın gələcək inkişafında əhəmiyyəti xüsusi vurğulandı. Hər bir səfər münasibətlərdə yeni səhifənin açılmasında mühüm rol oynayan sənədlərin imzalanması ilə diqqətdə olur. Prezident İlham Əliyev və Almaniyanın Federal Kansleri Fridrix Merts “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”ni imzaladılar. Eyni zamanda, Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə imzalandı. Reallıq budur ki, son illər Azərbaycanın enerji təhlükəsizliyinin təmin olunmasında, Şərq-Qərb və Şimal-Cənub nəqliyyat dəhlizlərinin inkişafında, həmçinin regional sabitliyin və əməkdaşlığın təşviqində oynadığı rol Avropa dövlətləri tərəfindən yüksək qiymətləndirilir. Bu baxımdan, Almaniya ilə strateji tərəfdaşlıq münasibətlərinin qurulması Azərbaycanın Avropa siyasi və iqtisadi məkanında mövqeyinin daha da möhkəmlənməsinə, Avropa İttifaqı ilə qarşılıqlı faydalı əməkdaşlığın yeni məzmun qazanmasına xidmət edən mühüm addım kimi dəyərləndirilir”.
Malik Həsənov vurğulayıb ki, Azərbaycanın beynəlxalq münasibətlər sistemində yerinin və mövqeyinin möhkəmlənməsi uğurlu xarici siyasətinin nəticəsidir.
Bölmənin digər xəbərləri
