AZƏRBAYCAN AVARÇƏKƏNLƏRİ BEYNƏLXALQ “AMBERS OARS” TURNİRİNDƏ İŞTİRAK EDƏCƏKLƏR
Bakı, 19 iyun (AZƏRTAC). Akademik avarçəkmə üzrə gənclərdən ibarət (U-23) Azərbaycan milli komandası iyunun 23-də Litvanın Trakay şəhərinə yollanacaq.
Yığmamız iyunun 27-də orada start götürəcək 47-ci beynəlxalq “Amber Oars” reqatasında mübarizə aparacaq.
İki gün davam edəcək yarışda ölkəmizi Cavid Əfəndiyev, Toğrul Qurbanzadə, Aleksandr Jdanov və Kamal Məmmədov təmsil edəcəklər.
Azərbaycan Milli Avarçəkmə Federasiyasından bildirmişlər ki, onlar 1 nəfərlik yüngül çəkili qayıqlarda mübarizə aparacaqlar. Bundan əlavə, C.Əfəndiyev-K.Məmmədov və T.Qurbanzadə-A.Jdanov duetləri 2 nəfərlik qoşa avarlı yüngül çəkili qayıqlarda qüvvələrini sınayacaqlar.
Turnirdən əvvəl komandamız Trakayda təlim-məşq toplantısı keçirəcək.
Bu yarış iyulun 23-dən 26-dək Çexiyada təşkil olunacaq gənclər arasında dünya çempionatına hazırlıq xarakteri daşıyır. Avarçəkənlərimiz səfərə millimizin almaniyalı baş məşqçisi Rudiger Hauffe və onun köməkçisi İlqar Ağalarovun rəhbərliyi altında çıxacaqlar.
İki gün davam edəcək “Amber Oars” reqatası Galve gölündə təşkil olunacaq.
Bölmənin digər xəbərləri
