AZƏRBAYCAN AVARÇƏKƏNLƏRİ “BÖYÜK MOSKVA REQATASI”NDA İŞTİRAK EDƏCƏKLƏR
Bakı, 4 iyun (AZƏRTAC). Azərbaycan Milli Avarçəkmə Federasiyasının mətbuat xidmətindən bildirmişlər ki, iyunun 4-də akademik avarçəkmə üzrə Azərbaycan milli komandası Rusiyanın paytaxtı Moskvaya yola düşmüşdür.
Avarçəkənlərimiz iyunun 6-da start götürəcək beynəlxalq “Böyük Moskva reqatası”nda çıxış edəcəklər. Sayca 48-ci dəfə keçiriləcək yarışda ölkəmizi 7 idmançı təmsil edəcəkdir.
Cavid Əfəndiyev - Toğrul Qurbanzadə - Aleksandr Jdanov - Kamal Məmmədov kvarteti 4 nəfərlik qoşa avarlı yüngül çəkili qayıqda mübarizə aparacaqdır. Bundan əlavə, həm Əfəndiyev - Məmmədov, həm də Qurbanzadə - Jdanov cütlükləri 2 nəfərlik qoşa avarlı yüngül çəkili qayıqlarda çıxış edəcəklər. Turqay Məmmədov - Mirzağa Eyvazov dueti 2 nəfərlik qoşa avarlı ağır çəkili qayıqlarda yarışacaqdır. Onların hər ikisinin ayrı-ayrılıqda 1 nəfərlik ağır çəkili qayıqlarda çıxışları da nəzərdə tutulmuşdur. Eyni zamanda, Kamran Yusubov da 1 nəfərlik ağır çəkili qayıqda qüvvəsini sınayacaqdır.
“Krılatskoe” avarçəkmə kanalında təşkil olunacaq ənənəvi turnirə Rusiya, Belarus, Bolqarıstan, Ukrayna, Qazaxıstan, Litva, Moldova, Özbəkistan və Estoniya avarçəkənləri də qatılacaqlar. Yarış ərəfəsində keçirdiyi mətbuat konfransında Rusiya Avarçəkmə İdmanı Federasiyasının prezidenti Leonid Draçevski bildirmişdir ki, “Böyük Moskva reqatası”nda 10 ölkənin iştirakı təşkilatçılar üçün böyük uğurdur.
Bölmənin digər xəbərləri
