Azərbaycan–Avropa İttifaqı əməkdaşlığı enerji təhlükəsizliyinin təmin olunmasında mühüm rol oynayır - ŞƏRH
Bakı, 13 mart, AZƏRTAC
Azərbaycan ilə Avropa İttifaqı arasında enerji sahəsində formalaşmış əməkdaşlıq strateji əhəmiyyət daşıyır. Azərbaycan Avropanın enerji təhlükəsizliyinin təmin olunmasında etibarlı tərəfdaş kimi mühüm rol oynayır. Ölkəmizin həyata keçirdiyi enerji siyasəti uzunmüddətli strateji yanaşmaya əsaslanır və bu siyasət nəticəsində Azərbaycan qlobal enerji bazarında mühüm mövqeyə sahib olub.
Bunu AZƏRTAC-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev bildirib.
Onun sözlərinə görə, Azərbaycanın təşəbbüsü və fəal iştirakı ilə həyata keçirilən beynəlxalq enerji layihələri Avropa ilə əməkdaşlığın möhkəmləndirilməsinə mühüm töhfə verir.
“Bu baxımdan regionun ən böyük enerji layihələrindən biri olan Cənub Qaz Dəhlizi xüsusi əhəmiyyət kəsb edir. Bu layihə Xəzər regionunun zəngin qaz ehtiyatlarının Avropa bazarlarına təhlükəsiz və etibarlı şəkildə çatdırılmasını təmin edir. Cənub Qaz Dəhlizi Avropanın enerji mənbələrinin şaxələndirilməsi strategiyasında mühüm yer tutur. Layihənin əsas seqmentlərindən biri olan Trans-Adriatik Boru Kəməri vasitəsilə Azərbaycan qazı artıq Avropanın bir sıra ölkələrinə ixrac olunur. Bu isə Avropa İttifaqının enerji təhlükəsizliyinin möhkəmləndirilməsinə real töhfə verir. Müasir dövrdə enerji təhlükəsizliyi yalnız iqtisadi sahə ilə məhdudlaşmır. Bu məsələ, eyni zamanda, milli təhlükəsizlik, regional sabitlik və beynəlxalq münasibətlər sistemində mühüm faktor kimi çıxış edir. Azərbaycanın yerləşdiyi strateji coğrafi mövqe ölkəmizi Şərq ilə Qərb arasında mühüm enerji və nəqliyyat qovşaqlarından birinə çevirib. Bu isə Azərbaycanın həm enerji resurslarının, həm də tranzit imkanlarının daha səmərəli şəkildə istifadə olunmasına imkan yaradır”, - deyə deputat əlavə edib.
Arzu Nağıyev qeyd edib ki, Azərbaycan son illər Avropa İttifaqı ilə enerji sahəsində əməkdaşlığın daha da genişləndirilməsi istiqamətində mühüm addımlar atır. Bu əməkdaşlıq yalnız qaz ixracı ilə məhdudlaşmır, eyni zamanda, yeni enerji marşrutlarının inkişafını və regional enerji təhlükəsizliyinin gücləndirilməsini də əhatə edir.
Deputat bildirib ki, Azərbaycan enerji sahəsində əməkdaşlığı yalnız ənənəvi resurslarla məhdudlaşdırmır: “Son illər ölkəmizdə bərpaolunan enerji sahəsində də mühüm layihələr həyata keçirilir. Xəzər dənizinin külək enerjisi potensialı və Azərbaycanın Günəş enerjisi imkanları Avropa ilə əməkdaşlıq üçün yeni perspektivlər yaradır. Azərbaycanın həyata keçirdiyi yaşıl enerji strategiyası çərçivəsində reallaşdırılan layihələr gələcəkdə bərpaolunan enerji resurslarının da Avropa bazarlarına ixracı üçün geniş imkanlar yaradacaq. Bu isə Azərbaycan ilə Avropa İttifaqı arasında enerji əməkdaşlığının daha dayanıqlı və uzunmüddətli əsaslar üzərində inkişaf etməsinə xidmət edəcək. Azərbaycan–Avropa İttifaqı əməkdaşlığı yalnız iqtisadi münasibətlərlə məhdudlaşmır. Bu tərəfdaşlıq regionda sabitliyin və təhlükəsizliyin möhkəmləndirilməsinə, həmçinin beynəlxalq əməkdaşlığın inkişafına da mühüm töhfə verir. Mövcud geosiyasi şəraitdə Azərbaycan ilə Avropa İttifaqı arasında əməkdaşlıq strateji tərəfdaşlıq xarakteri daşıyır və bu münasibətlər gələcək illərdə daha da inkişaf edəcək. Azərbaycan beynəlxalq tərəfdaşlarla əməkdaşlığı davam etdirərək qlobal enerji təhlükəsizliyinin təmin olunmasına bundan sonra da öz töhfəsini verəcək”.
Bölmənin digər xəbərləri
