Azərbaycan Dövlət Pedaqoji Universitetində 20 Yanvar şəhidlərinin xatirəsi ehtiramla anılmışdır
Bakı, 17 yanvar (AZƏRTAC). Yanvarın 17-də Azərbaycan Dövlət Pedaqoji Universitetində (ADPU) 20 Yanvar faciəsinin iyirmi dördüncü ildönümü ilə bağlı faciə qurbanlarının xatirəsini anma mərasimi keçirilmişdir.
AZƏRTAC xəbər verir ki, ADPU-nun professor-müəllim heyəti və tələbələr mərasimdən əvvəl Şəhidlər xiyabanını ziyarət edərək, ölkəmizin azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etmişlər.
Sonra mərasim universitetdə davam etdirilmişdir. Tədbirdə Xalq şairi Qabilin “Mərsiyə” şeiri səsləndirilmişdir.
Universitetin rektoru, professor Yusif Məmmədov çıxış edərək, 1990-cı il yanvarın 19-dan 20-nə keçən gecə sovet qoşunlarının törətdikləri vəhşilikdən danışmışdır. Bildirilmişdir ki, ümummilli liderimiz Heydər Əliyev yenidən siyasi hakimiyyətə qayıtdıqdan sonra 1990-cı ilin 20 Yanvar hadisələrinə hüquqi-siyasi qiymət verilmişdir.
Rektor demişdir ki, 1990-cı il yanvarın 20-də Azərbaycan xalqına qarşı həyata keçirilən vandalizm, terror aktı insanlığa qarşı törədilmiş ən ağır cinayətlərdən biridir. İmperiya rəhbərliyinin bu cinayətkar əməli xalqımızın əzmkar iradəsini, azadlıq uğrunda mübarizəsini qıra bilməmiş, qanlı 20 Yanvar müasir Azərbaycan tarixinə həm faciə, həm də qəhrəmanlıq səhifəsi kimi daxil olmuşdur. Bu əzmin, mübarizənin sayəsində və qanı bahasına xalqımız azadlığına qovuşmuşdur. Ulu Öndərin siyasi kursunun layiqli davamçısı Prezident İlham Əliyev 20 Yanvar şəhidlərinin ailə üzvlərinə daim diqqət və qayğı ilə yanaşır.
Tədbirdə 20 Yanvar faciəsindən bəhs edən film göstərilmişdir.
Sonda tələbələr 20 Yanvar şəhidlərinin xatirəsinə həsr olunmuş ədəbi-bədii kompozisiya nümayiş etdirmişlər.
Bölmənin digər xəbərləri
