Azərbaycan Fransanın ölkəmizə qarşı neokolonialist siyasət aparmasına imkan verməyəcək Politoloq
Bakı, 1 sentyabr, AZƏRTAC
Fransa 1997-ci ildən ATƏT-in Minsk qrupunun həmsədri idi. Azərbaycan bu həmsədrliyə icazə verməklə Fransanın “ermənipərəst” siyasətini zərərsizləşdirməyə nail olmuşdu. Çünki həmsədrlər bitərəf davranmağa məcbur idilər. Minsk qrupuna üzv olan Fransa Azərbaycan-Ermənistan münaqişəsinin sülh yolu ilə həlində heç bir rol oynaya bilmədi. Azərbaycan öz torpaqlarını 2020-ci ildə işğaldan azad etməsi ilə Minsk qrupundan da imtina etdi.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
Onun sözlərinə görə, Azərbaycan tərəfindən Cənubi Qafqazdan qovulmuş Fransa müxtəlif təxribatlar törədərək geri dönmək istəyir. Rusiyanın onlara xəyanət etdiklərini düşünən və ondan revanş üçün istədikləri dəstəyi ala bilmədiklərinə görə küsən separatçılara himayədarlıq edir. Əslində isə Fransanın erməni “sövdası” da saxtadır. Yəni, Fransanın Ermənistanı dəstəkləmək görüntüsü ilə Cənubi Qafqazda yerləşmək istəməsinin arxasında başqa niyyətləri var.
Fransanın əsas məqsədi inkişaf edən, geniş iqtisadi imkanlara malik, karbohidrogen və bioenerji ilə zəngin olan, mühüm coğrafi mövqedə yerləşən, beynəlxalq nəqliyyat və kommunikasiya yollarına sahib ölkəmizə qarşı təzyiq etmək üçün müəyyən vasitələr əldə etməkdir.
Onun digər məqsədi Ukrayna müharibəsi ilə regionumuzda zəifləyən Rusiyanın yerini doldurmaq, həmçinin Türkiyənin Cənubi Qafqazda və Orta Asiyada güclənən nüfuzuna mane olmaq, türk və islamofob hərəkətlərini davam etdirməkdir.
“Azərbaycanın Laçın yolunda sərhəd-buraxılış məntəqəsi qurmasını ermənilərə qarşı “blokada” kimi qiymətləndirən və Avropa İttifaqında və BMT-dəki imkan və statusundan istifadə edərək ölkəmizə qarşı qarayaxma kampaniyası apararaq beynəlxalq ictimaiyyəti aldadır. Ərazimizdə yaşayan erməniəsilli şəxslərin “humanitar böhran” ilə üzləşdiyi yalanına əsaslanaraq, onlara yardım etmək adı ilə kampaniya başlaması, bununla bağlı dövlətimizə təzyiqlər göstərməsi beynəlxalq hüquqda və BMT Nizamnaməsində qeyd olunan “dövlətlərin ərazi bütövlüyü” və “ölkələrin daxili işlərinə müdaxilənin yol verilməzliyi” prinsiplərinin pozulmasıdır. Dünyada sülhün və təhlükəsizliyin təminatçısı olan BMT-nin Təhlükəsizlik Şurasının üzvü olan bir ölkənin belə hərəkətləri beynəlxalq səviyyədə müzakirələrə çıxarılmalı və qınanmalıdır”, - deyə Yalçın Hacızadə vurğulayıb.
Politoloq əlavə edib ki, heç bir vizyonu, strategiyası olmayan və ən əsası subyektiv liderlik keyfiyyətlərinin defisitindən əziyyət çəkən, Fransanın ən uğursuz prezidentlərindən biri olan Emmanuel Makron uğursuz siyasəti nəticəsində Avropa İttifaqında və Afrikada üzləşdiyi məğlubiyyətini, nüfuz itkisini separatizmə dəstək verməklə Cənubi Qafqazda bərpa etmək istəyir.
Azərbaycan rəsmi Parisin hər təxribatına, ərazi bütövlüyünə zidd, separatizmi dəstəkləyən bəyanatına və hərəkətinə daha tutarlı cavablar verməklə, diplomatik müstəvidə onu mat edə bilir. Azərbaycan dövləti Rusiya sülhməramlılarının müvəqqəti yerləşdiyi ərazidə yaşayan və guya “humanitar böhranla” üzbəüz qalan erməniəsilli şəxslərə yardım məqsədilə göndərdiyi 40 ton humanitar yardım separatçılar tərəfindən qəbul olunmayıb. Eyni zamanda, ərazidə yaşayan ermənilər sosial şəbəkələr vasitəsilə yayımlar edərək “biz türk unu yemirik” tipli bəyanatlar paylaşırlar. Görünən odur ki, Azərbaycan tərəfi addım atan kimi “blokadadayıq”, “aclıqdan ölürük” kimi əsassız ittihamlar irəli sürən separatçılar və onların dəstəkçilərinin yalanları ifşa olunur. “Biz türk unu yemirik” kimi fikirləri ilə nə qədər faşist ruhlu və nifrət dolu olduqlarını da göstərirlər.
“Sərhəddə kimin hansı şounu göstərməsindən asılı olmayaraq, Azərbaycan öz şərtlərini açıqlayıb. Yəni, Fransanın regionda yeni reallıqları qəbul etmədən, münaqişəni alovlandırmağa çalışması Cənubi Qafqazda sülhün əldə olunmasına mane olsa da, bütün bunlardan itirən tərəf Ermənistan olacaq. Bundan əlavə, Azərbaycan dövləti separatizmin yenidən baş qaldırmasına və Fransanın ölkəmizə qarşı neokolonialist siyasəti aparmasına imkan verməyəcək”, - deyən Yalçın Hacızadə fikirlərini yekunlaşdırıb.
Bölmənin digər xəbərləri
