Azərbaycan gəncləri Avropa İttifaqının ölkəmizə qarşı ikili standartlarına kəskin etiraz edib
Bakı, 11 iyun, AZƏRTAC
Azərbaycanda fəaliyyət göstərən gənclər təşkilatlarının təmsilçiləri iyunun 11-də Avropa İttifaqının Bakıdakı nümayəndəliyinin qarşısında etiraz aksiyası keçiriblər.
Aksiya iştirakçıları Avropa İttifaqının Azərbaycana qarşı nümayiş etdirdiyi ikili standartlara kəskin etiraz ediblər. Gənclər “Azərbaycana qarşı idman vasitəsilə təzyiq yolverilməzdir”, “Azərbaycan xalqının milli maraqlarına qarşı çıxmaqdan əl çəkin!”, “Azərbaycana qarşı antitəbliğat işlərinə son qoyun!”, “İdmanı siyasiləşdirməyin!”, “Rədd olsun neoimperializm!” kimi şüarlar səsləndiriblər.
Aksiya iştirakçıları ölkəmizə qarşı bu cür qarayaxma kampaniyalarının, ikili standartların təkcə gənclərimiz deyil, bütün xalqımız tərəfindən narazılıqla qarşılandığını bildiriblər. Onlar Azərbaycanın möhtəşəm idman bayramını qeyd etdiyi bir vaxtda bu cür çirkin kampaniyalarla üzləşməsinin böyük ədalətsizlik olduğunu vurğulayıblar. Qeyd ediblər ki, əgər Avropa İttifaqı insan hüquqlarına bu qədər çox önəm verirsə, ilk növbədə Ermənistanın təcavüzkarlıq siyasəti nəticəsində qaçqın və məcburi köçkünə çevrilmiş bir milyondan artıq azərbaycanlının hüquqlarını müdafiə etməlidir.
Aksiyanın sonunda qətnamə oxunub və nümayəndəliyə təqdim edilib. Qətnamədə deyilir:
“İyunun 12-də təntənəli açılışı gözlənilən birinci Avropa Oyunları öz miqyasına və əhəmiyyətinə görə adi bir idman yarışması olmayıb, son illər qitənin sosial və mədəni həyatında baş verən ən mühüm hadisələrdən biridir. Bu möhtəşəm idman bayramını təşkil etmək məsuliyyətini öz üzərinə götürmüş Azərbaycan qısa müddətdə bütün hazırlıq işlərini uğurla yekunlaşdıra bilib. Bununla belə, ölkəmizin sürətli inkişafını, siyasi plüralizm, vətəndaş cəmiyyəti və hüququn aliliyinin təmin edilməsi istiqamətində qazandığı uğurları gözü götürməyən bəzi dairələr fürsətdən yararlanaraq, misli görünməmiş böhtan və qarayaxma kampaniyası aparmağa başlayıb. Xeyli müddətdir ki, erməni lobbisinin təhriki və neoimperialist təfəkkürlü qüvvələrin himayəsi altında fəaliyyət göstərən bir sıra xarici QHT-lər və media orqanları Oyunların əhəmiyyətini azaltmaq, Azərbaycanı gözdən salmaq üçün ciddi-cəhdlə çalışırlar. Təəssüf ki, bütün Avropa ölkələrini və xalqlarını bir yerə toplayan, birliyi, dostluğu və həmrəyliyi tərənnüm edən birinci Avropa Oyunlarının təşkilatçısına qarşı aparılan bu cür şərəfsiz missiyaya Avropa Parlamentindəki müxtəlif qruplaşmalar və qurumun rəhbərliyində təmsil olunan bəzi şəxslər də qoşulub. Biz, Azərbaycandakı gənclər təşkilatlarının təmsilçiləri, anti-Azərbaycan şəbəkəsinin əlaltısı rolunda çıxış edərək çirkin əməlləri ilə öz reputasiyalarını korlamış Martin Şults və Ulrike Lunaçek kimilərin demokratiya və azadlıq ideyalarına zidd hərəkətlərə etiraz edir, Azərbaycana qarşı qərəzli və məkrli fəaliyyətlərə son qoymağı tələb edirik. Eyni zamanda, Krımın ilhaqına görə Rusiyaya qarşı sərt sanksiyalar tətbiq etmiş Avropa İttifaqının və təşkilata üzv ölkələrin rəhbərliyindən işğalçı Ermənistana qarşı da adekvat addımların atılmasını gözləyirik. Ümid edirik ki, Avropa Parlamentindəki sağlam düşüncəli deputatlar, Avropa Komissiyası və Avropa İttifaqı Şurası bizim etirazımızı anlayışla qarşılayıb tələblərimizi nəzərə alacaq.
Azərbaycan Respublikasında fəaliyyət göstərən gənclər təşkilatlarının təmsilçiləri”.
Bölmənin digər xəbərləri
