AZƏRBAYCAN GİMNASTLARI ESTONİYADA 3 GÜMÜŞ VƏ 3 BÜRÜNC MEDAL QAZANMIŞLAR
Bakı, 23 fevral (AZƏRTAC). May ayında Bakıda keçiriləcək bədii gimnastika üzrə Avropa çempionatına hazırlaşan Azərbaycanın yeniyetmələrdən ibarət qrup komandası Estoniyada başa çatmış “Miss Valentina” beynəlxalq turnirində 3-cü yerə layiq görülmüşdür.
Azərbaycan Gimnastika Federasiyasının mətbuat xidməti xəbər verir ki, qızlarımız 5 lentlə kompozisiyaya görə yarışın ilk günü üçüncü yerdə olmuşlar. Səbinə Abbasova, Aelita Xələfova, Kamilə Məmmədova, Nigar Əbdüsəlimova, Yevgeniya Jidkova və ehtiyat gimnast Nərgiz Məmmədovadan ibarət qrup komandamız turnirin ikinci günü də medala layiq yeri qoruyub saxlayaraq, son nəticədə 45,08 bal toplamışdır.
Komandanın məşqçisi Mariana Vasilyeva demişdir: “Beləliklə, komandanın ilk çıxışı uğurlu oldu. Qızlar xalça üzərində bəzən ram etmək çətin olan lentlə hərəkət mexanizmini yaxşı mənimsəmişlər. Lakin biz məşqçilər hələ çox işləməliyik. Yeri gəlmişkən, bunu komandaları ilk iki yeri tutmuş rusiyalı və belaruslu həmkarlarımız da qeyd etmişlər. Yaxın planlarımız martın 6-8-də Budapeştdə keçiriləcək turnirlə bağlıdır. May ayında keçiriləcək Avropa çempionatına qədər qızlar tam formaya düşəcəklər”.
Lakin Estoniya turnirində əldə olunan medallara təkcə yeniyetmə gimnastlarımız sevinmirdilər. 13 yaşlı bakılı gimnast Ayişə Mustafayeva bu turnirdə üç gümüş və bir bürünc medal qazanmışdır. O, ip, halqa və topla hərəkətlərdə ikinci, gürzlə hərəkətlərdə isə bolqarıstanlı Steliana Yankovadan cəmi 0,02 bal geri qalaraq üçüncü nəticəni göstərmişdir.
Bu yarışda daha bir Azərbaycan gimnastı fərqlənmişdir. 12 yaşlı bakılı gimnast Yekaterina Prokopenko topla hərəkətlərdə üçüncü yerə layiq görülmüş, halqa və gürzlə hərəkətlərdə isə 8-ci olmuşlar.
Bölmənin digər xəbərləri
