Bunu AZƏRTAC-a müsahibəsində Güləş Federasiyasının

prezidenti Fazil Məmmədov demişdir

Azərbaycan güləşçiləri Pekin Yay Olimpiadasına ciddi hazırlaşırlar. Olimpiadaya hazırlıq çərçivəsində keçirilən beynəlxalq yarışlarda Azərbaycan güləşçiləri ölkəmizin idman şərəfini layiqincə qoruyaraq lisenziyaların əldə edilməsi üzrə qarşıya qoyulmuş vəzifəni yerinə yetirmişlər. Pekin Olimpiadası ərəfəsində sonuncu beynəlxalq turnir iyunun 27-29-da Bakıda keçiriləcəkdir. Azərbaycan güləşçilərinin Pekin Olimpiadasına və beynəlxalq turnirə hazırlığı ilə əlaqədar AZƏRTAC-ın müxbirinin suallarını Güləş Federasiyasının prezidenti Fazil Məmmədov cavablandırmışdır.

-Əvvəlcə, istərdik ki, sərbəst, yunan-Roma və qadın güləşi üzrə komandalarımızın olimpiadaqabağı çıxışlarına münasibət bildirəsiniz. İdmançılarımız ümidləri doğrultdumu?

-Hesab edirəm ki, bu suala birmənalı cavab vermək olar. Çünki Azərbaycan xalqının ümummilli lideri Heydər Əliyevin rəhbərliyi altında inkişafına təkan verilmiş bədən tərbiyəsi və idman sahəsindəki ənənələr bu gün də layiqincə davam etdirilir. İdmançılarımız son illər ərzində bir çox beynəlxalq yarışlarda ölkəmizi layiqincə təmsil etmişlər və edirlər. Bütün bunlar dövlətimizin başçısı, Milli Olimpiya Komitəsinin prezidenti İlham Əliyevin idmana yüksək diqqət və qayğısının nəticəsində mümkün olmuşdur.

Bu baxımdan, güləşçilərimiz də son dünya və Avropa çempionatlarında, 2008-ci il Pekin Yay Olimpiya Oyunlarına lisenziya xarakterli yarışlarda uğurla çıxış etmişlər. Azərbaycan pəhləvanları sərbəst, yunan-Roma və qadın güləşi növlərində 16 vəsiqə əldə etmişlər. Bu, ölkəmizin güləş idmanı tarixində rekord göstəricidir. İndiyədək Olimpiya oyunlarına Azərbaycan ən yaxşı halda 9 güləşçi ilə qatılmışdır. Lisenziyaların əldə edilməsi üzrə qarşıya qoyulmuş vəzifələr demək olar ki, yerinə yetirilmişdir. Ölkəmiz idmanın sərbəst güləş növündə bütün çəki dərəcələrində, yunan-Roma güləşində isə 6 çəki dərəcəsində təmsil olunacaqdır. Eyni zamanda, Pekin Olimpiadasında ilk dəfə qadın güləşçilərimiz də mübarizə aparacaqlar. Qadın güləşində 3 idmançımız Pekinə yollanmaq hüququ qazanmışdır. Faktiki olaraq yalnız iki çəkidə, yəni yunan-Roma növündə 96, qadınların mübarizəsində isə 72 kq çəkidə idmançılarımız Olimpiadada iştirak etməyəcəklər.

Beləliklə, sualınızın cavabına qısaca yekun vursaq, nəticələrdən razıyıq. İndi əsas diqqəti məşqlərə yönəltmişik ki, əldə edilən uğurları Olimpiya medalları ilə təsdiqləmək mümkün olsun.

-Pekin Olimpiadası ərəfəsində sonuncu beynəlxalq turnir iyunun 27-dən 29-dək Bakıda keçiriləcəkdir. Azərbaycan xalqının ümummilli lideri Heydər Əliyevin xatirəsinə həsr olunmuş güləş üzrə “Qızıl Qran Pri” turnirinin final mərhələsi ilə bağlı məlumat verməyinizi xahiş edirik.

-Azərbaycan xalqının ümummilli lideri Heydər Əliyevin əziz xatirəsinə həsr olunmuş “Qızıl Qran Pri” beynəlxalq turnirinin final mərhələsində idmançılar hər çəki kateqoriyası üzrə ilin ən yaxşı güləşçisi adı uğrunda mübarizə aparacaqlar. Buna qədər 3 ölkədə - Macarıstanın Szombathely şəhərində yunan-Roma güləşi üzrə, Rusiyanın Krasnoyarsk şəhərində sərbəst güləş və qadın güləşi üzrə, Türkiyədə isə iki dəfə - İstanbulda yunan-Roma güləşi üzrə, Ankarada isə sərbəst güləş və qadın güləşi üzrə turnirlər keçirilmişdir.

Düzdür, bu yarış lisenziya xarakterli deyildir. Lakin Olimpiadaya vəsiqə almış güləşçilər üçün rəqiblərini tanımaq və təcrübələrini artırmaq baxımından olduqca əhəmiyyətlidir. Odur ki, yarışa maraq böyükdür. Final mərhələsində iştirak edən ölkələrin və iştirakçıların sayını FİLA müəyyən edir. Təşkilatçı isə Azərbaycan Güləş Federasiyasıdır.

Final yarışlarına əvvəlki “Qran Pri” turnirlərində ilk “8-liyə” düşən idmançılar, Avropa, Asiya və Afrika qitə birinciliklərinin qalibləri dəvət ediliblər. Hazırda turnirdə iştirak edəcək ölkələrin və idmançıların siyahısı FİLA-nın birbaşa iştirakı ilə dəqiqləşdirilir. Lakin ilkin olaraq deyə bilərəm ki, burada təxminən 39 ölkədən 300-dən çox idmançı dəvətlidir.

-Bəs, turnirə hazırlıq necə gedir?

-Turnirin yüksək səviyyədə keçirilməsi üçün Təşkilat Komitəsi yaradılmışdır. Bizim artıq dünya səviyyəli yarışları təşkil etmək təcrübəmiz var və güman edirəm ki, FİLA da məhz əvvəlki yarışların təşkili təcrübəsindən çıxış edərək bu mötəbər yarışın Bakıda keçirilməsinə, ulu öndərimiz Heydər Əliyevin xatirəsinə həsr olunmasına razılıq vermişdir.

Yarışlar Bakı İdman Oyunları Sarayında keçiriləcəkdir. Sarayda müvafiq təhcizat və hazırlıq işləri gedir. Yarış iştirakçılarının hotel və nəqliyyat vasitələri ilə təmin olunması, eləcə də ictimaiyyətin yarışa marağının artırılması məqsədi ilə paytaxt ərazisində reklam lövhələrinin yerləşdirilməsi üçün bütün tədbirlər görülür. Hesab edirəm ki, yarışın təşkili baxımından heç bir problem olmayacaq və iştirakçılar Bakı turnirindən məmnun qalacaqlar.

-“Qızıl Qran Pri” turnirində idmançılarımızın qarşısına hansı məqsəd qoyulub?

-Qeyd etdiyim kimi, yarış əsasən rəqiblərin tanınması baxımından əhəmiyyətlidir. Olimpiadaqabağı bu çox vacibdir. Turnirdə iştirak edəcək bir çox idmançılar Olimpiadaya lisenziya əldə etmiş pəhləvanlardır. Onların taktikasını öyrənmək bizim üçün faydalı olardı. Ümumiyyətlə, Azərbaycan güləşçiləri heç bir yarışa və ya turnirə məqsədsiz qatılmırlar. Təbii ki, final yarışlarının qalibi olmaq bizim arzumuzdur.

-Bu turnirin növbəti illərdə də keçirilməsi nəzərdə tutulubmu?

-Bilirisiniz ki, artıq ikinci dəfədir ki, “Qızıl Qran Pri” turnirinin final mərhələsi Bakıda keçirilir. Əlbəttə, FİLA etimad edərsə, bu yarışları biz gələcəkdə də Bakıda təşkil etməyə hazırıq. Ümumiyyətlə, dünyamiqyaslı turnirlərin paytaxtımızda təşkil olunması Federasiyanın siyasətinin tərkib hissəsidir. Bu bizim idman sahəsindəki nüfuzumuzun və təcrübəmizin artmasına əlavə imkanlar yaradır.

-Sonda istərdik, yenidən Pekin olimpiadası ilə bağı mövzuya qayıdaq. Güləşçilərimizdən Olimpiadada nə gözləyirsiniz?

-Təbii ki, pəhləvanlarımız qarşısında maksimum nəticə əldə edilməsi vəzifəsi qoyulacaqdır. Açığını deyim ki, idmançıların hazırlıq səviyyəsi, son lisenziya xarakterli turnirlərdə göstərdikləri nəticələr bizə Olimpiadada əldə oluna biləcək nəticələr barədə böyük ümidlər verir. Amma təbii ki, Olimpiadada iştirak edən hər bir idmançı seçilmiş pəhləvandır və burada asan rəqib yoxdur. Çətin olacaq, lakin mən güləşçilərmizə inanıram. Ad çəkmək istəməzdim, istər sərbəst, istər yunan-Roma güləşində, istərsə də ilk dəfə qatıldığımız qadın güləşi növündə yüksək nəticələr əldə etmək üçün bütün şanslarımız vardır. İdmançılara yüksək nəticə əldə etmək üçün hər bir şərait yaradılıb - təcrübəli məşqçi korpusu, hazırlıq üçün müasir məşq zalları və s. Qalır yalnız nəticə qazanmaq!