Azərbaycan-Özbəkistan münasibətləri regional strateji maraqların vəhdətinə əsaslanır ŞƏRH
Bakı, 25 avqust, AZƏRTAC
Prezident İlham Əliyevin Özbəkistana dövlət səfəri çərçivəsində Daşkənddə mətbuata verdiyi bəyanat iki qardaş ölkə arasında münasibətlərin bugünkü vəziyyətinin və inkişaf perspektivlərinin geniş mənzərəsini ortaya qoyub. Dövlətimizin başçısının fikirləri yalnız Özbəkistanın son illərdə əldə etdiyi sosial-iqtisadi nailiyyətlərin qiymətləndirilməsi deyil, eyni zamanda, Azərbaycan-Özbəkistan münasibətlərinin hansı inkişaf mühitində yeni mərhələyə qədəm qoyduğunu göstərən mühüm siyasi mesajdır.
Bu sözləri AZƏRTAC-a açıqlamasında Milli Məclisin deputatı Şahin Seyidzadə deyib.
O vurğulayıb ki, səfər Azərbaycan və Özbəkistan arasında münasibətlərin artıq ənənəvi ikitərəfli əlaqələr çərçivəsini aşdığını və daha geniş regional proseslərin mühüm tərkib hissəsinə çevrildiyini bir daha nümayiş etdirib. Dövlət başçılarının görüşləri, Ali Dövlətlərarası Şuranın 3-cü iclası, imzalanan sənədlər, iqtisadi və humanitar layihələrin açılış və təməlqoyma mərasimləri, eləcə də prezidentlərin qarşılıqlı yüksək dövlət təltifləri münasibətlərin siyasi, iqtisadi və mənəvi dayaqlarının möhkəmliyini göstərib.
“İmzalanan sənədlər arasında 2030-cu ilədək qarşılıqlı ticarətin bir milyard ABŞ dollarına çatdırılmasına dair proqramın yer alması bu hədəfin institusional əsasının formalaşdırıldığını göstərir. Həmçinin investisiya və ticarət sahəsində əldə olunan razılaşmaların icrasına dair praktiki fəaliyyət planının qəbul edilməsi iqtisadi əməkdaşlığın yalnız siyasi bəyanatlar səviyyəsində qalmadığını, konkret mexanizmlərlə təmin olunduğunu nümayiş etdirir. Azərbaycan və Özbəkistan arasında iqtisadi əməkdaşlığın digər mühüm xüsusiyyəti onun çoxşaxəli xarakter daşımasıdır. Energetika, nəqliyyat, investisiya, turizm, dağ-mədən sənayesi, avtomobil istehsalı, kənd təsərrüfatı, emal sənayesi, bankçılıq və digər istiqamətlər üzrə əlaqələr qarşılıqlı iqtisadi maraqların genişliyini göstərir. Səfər çərçivəsində bir sıra Azərbaycan layihələrinin açılışının və yeni layihələrin təməlinin qoyulması da bunun əyani nümunəsidir. Belə ki, Azərbaycan və Özbəkistan arasında iqtisadi münasibətlər yalnız iki paytaxtın əməkdaşlığı ilə məhdudlaşmır. Regionlararası əlaqələrin genişləndirilməsi də yeni iqtisadi imkanların yaranmasına xidmət edir”, - deyə deputat bildirib.
Azərbaycan-Özbəkistan münasibətlərinin artıq ənənəvi diplomatik münasibətlər çərçivəsindən kənara çıxdığını vurğulayan Ş.Seyidzadə əlavə edib: “Bu münasibətlər siyasi etimad, iqtisadi qarşılıqlılıq, mənəvi yaxınlıq, humanitar əməkdaşlıq və regional strateji maraqların vəhdətinə əsaslanır. Bu gün Azərbaycan və Özbəkistan qarşılıqlı etimadı konkret layihələrə, siyasi iradəni iqtisadi nəticələrə, tarixi qardaşlığı müasir strateji müttəfiqliyə çevirən nümunəvi münasibətlər modeli ortaya qoyur. Ən mühüm məsələ isə bundan sonrakı mərhələdə əldə olunan razılaşmaların ardıcıl və səmərəli şəkildə icra edilməsidir. Səfər zamanı ortaya qoyulan fəaliyyət planı, qarşılıqlı investisiyalar, ticarətin bir milyard dollara çatdırılması məqsədi, regionlararası əlaqələrin genişləndirilməsi və yeni birgə layihələr bu istiqamətdə möhkəm zəmin yaradır. Azərbaycan və Özbəkistanın qarşıdakı illərdə daha sıx iqtisadi inteqrasiya, daha geniş nəqliyyat əməkdaşlığı, yeni investisiya layihələri və humanitar əlaqələrin inkişafı istiqamətində mühüm nəticələr əldə edəcəyi üçün bütün əsaslar mövcuddur”.
Bölmənin digər xəbərləri
