Azərbaycanın və Rusiyanın dövlət bayraqları ilə bəzədilmiş hava limanında Prezident İlham Əliyevin şərəfinə fəxri qarovul dəstəsi düzülmüşdü.

Azərbaycan Respublikasının və Rusiya Federasiyasının dövlət himnləri səsləndi.

Fəxri qarovul dəstəsinin rəisi Azərbaycan Prezidentinə raport verdi. Prezident İlham Əliyev fəxri qarovul dəstəsinin qarşısından keçdi.

Azərbaycan Prezidenti İlham Əliyevi RF hökuməti sədrinin müavini Viktor Xristenko və Rusiya hökumətinin yüksək vəzifəli digər rəsmi şəxsləri, Azərbaycanın Moskvadakı səfiri Ramiz Rizayev, Rusiyanın Azərbaycandakı səfiri Nikolay Ryabov yola saldılar.

Azərbaycan Prezidenti İlham Əliyev həmin gün gecə Bakıya qayıtdı.

Dövlətimizin başçısı Binə hava limanında jurnalistlərin suallarına cavab verdi.

SUAL: Cənab Prezident, belə məlumat yayılıb ki, ABŞ-ın dövlət katibi Kolin Pauell Moskvaya səfəri zamanı Rusiyanın xarici işlər naziri İvanovla görüşündə Dağlıq Qarabağ münaqişəsinin tənzimlənməsinə dair hansısa təkliflər barədə söhbət olmuşdur. Siz İvanovla görüşmüsünüz, hər hansı təklif varmı?

CAVAB: Əlbəttə, biz görüşdük, münaqişə barədə də söhbətlərimiz oldu. Təkliflər, yəqin ki, olmalıdır. Bilirsiniz ki, bu problemin həll edilməsi istiqamətində işlər bir növ lazımi səviyyədə qurulmayıbdır. Biz istəyirik ki, bu proses daha da intensivləşsin. Əlbəttə, təkliflər olmalıdır. Mən bu dəfə də öz mövqeyimi bildirdim və bəyan etdim ki, Minsk qrupu öz mövqeyini bildirməlidir, yeni təkliflərlə çıxış etməli, özünü müşahidəçi kimi aparmamalıdır. Ola bilər ki, yaxın zamanlarda hansısa təkliflər olsun. Amma bu məsələ ilə bağlı elə konkret söhbətimiz olmayıbdır.

SUAL: Cənab Prezident, 5 rayonun qaytarılması məsələsi Avropa Parlamentində də səslənir. Rusiya Prezidenti ilə Dağlıq Qarabağ problemi müzakirə olunarkən belə bir məsələyə toxunuldumu?

CAVAB: Bu, yeni məsələ deyildir. Avropa İttifaqı bu məsələni haradasa, 3-4 il bundan əvvəl irəli sürmüşdü. O vaxt Ermənistan buna razılıq verməmişdi. Ermənistanın təbliğat kampaniyası ona yönəlib ki, guya Azərbaycan onu mühasirəyə alıbdır. Ancaq bu, belə deyildir. Siz deyən yeni məsələ deyil, müzakirə oluna bilər. Biz özümüz müəyyən etməliyik ki, bu, nə dərəcədə məqbuldur. Hələlik bu barədə danışmaq bir qədər tezdir. Əgər rəsmi şəkildə təklif edilərsə, - biz Minsk qrupunu gözləyə bilərik, mandat Minsk qrupundadır, - o vaxt ona münasibət bildirmək olar. Amma hesab edirəm ki, bütün mümkün olan variantlar nəzərdən keçirilməlidir. Biz baxmalıyıq ki, bunu necə həll edək. Amma mən öz mövqeyimi bir daha açıq-aydın bildirdim. Azərbaycanın ərazi bütövlüyü bərpa olunmalıdır. İşğalçı qüvvələr zəbt olunmuş torpaqlardan çıxmalıdır. Bu problem, Ermənistan-Azərbaycan münaqişəsi konstruktiv prinsiplər əsasında öz həllini tapa bilər. Bu məsələ ilə bağlı bizim söhbətlərimiz olubdur. Mən Azərbaycanın mövqeyini bütün səviyyələrdə bildirmişəm.

SUAL: Cənab Prezident, Bakı-Novorossiysk kəməri ilə Azərbaycan neftinin bundan sonra nəql olunması barədə nə deyərdiniz?

CAVAB: Bəyannamə yəqin ki, Sizə də təqdim ediləcəkdir. Görəcəksiniz, orada belə bir niyyət ifadə olunubdur ki, bu məsələ uzunmüddətli əsaslarla öz həllini tapmalıdır. Azərbaycan nefti şimal marşrutu ilə dünya bazarlarına çıxarılmalıdır. Eyni zamanda, Azərbaycana təbii qazın ötürülməsi də təmin edilməlidir. Amma orada hər hansı bir öhdəlik yoxdur. Orada niyyət şəklində göstərilir. Bildiyiniz kimi, bu marşrut fəaliyyətdədir. Uzun müddətdir ki, Azərbaycan nefti bu marşrut ilə göndərilir. Biz maraqlıyıq ki, Bakı-Novorossiysk neft kəməri işləsin. Neft kəməri nə qədər işlək vəziyyətdə olarsa, o qədər sərfəlidir.

SUAL: Cənab Prezident, biz Sizin mövqeyinizi bilmək istəyirik. Azərbaycan Prezidenti hansı variantın tərəfdarıdır? Dağlıq Qarabağ probleminin ciddi kompromislər yolu ilə indiki məqamda həllinin, yoxsa gözləməyin tərəfdarıdır?

CAVAB: Mən bu məsələdə kompromislərin tərəfdarı deyiləm. Mən hesab edirəm və öz mövqeyimi açıq-aydın bildirmişəm ki, beynəlxalq hüquq normaları bizim tərəfimizdədir. Haqq-ədalət bizim tərəfimizdədir. Zaman dəyişir, əgər biz ölkələrə iqtisadi potensial baxımından qiymət versək, o da bizim tərəfimizdədir. Ona görə də mən hesab edirəm ki, biz gərək tələskənliyə yol verməyək. Mən tələsmirəm. Hesab edirəm ki, məsələni həll etmək üçün gərək gözləyək. Əminəm ki, Azərbaycanın iqtisadi potensialı güclənir və bundan doğan digər məsələlər öz həllini tapdıqca, ölkəmiz istədiyinə nail olacaqdır. Bizim heç kimin torpağında gözümüz yoxdur. Biz istəyirik ki, Azərbaycan torpaqları ölkəmizə qaytarılsın, münaqişə sülh yolu ilə öz həllini tapsın. Eyni zamanda, bu məsələ yalnız dediyim prinsiplər çərçivəsində öz həllini tapa bilər. Bu mövqeyimiz bu dəfə də çox aydın şəkildə Moskvada bildirildi.

SUAL: Cənab Prezident, Siz ATƏT-in üzvü olan iki dövlətə səfər etmisiniz. Necə düşünürsünüz, bu səfərlərdən sonra ATƏT vasitəçilərinin işində fəallıq müşahidə olunacaq, ya yox?

CAVAB: Mən ümid edirəm ki, olacaq. Həm Fransanın Prezidenti, həm də Rusiyanın Prezidenti mənə bildirdilər ki, onlar münaqişənin həll olunmasında maraqlıdırlar. Mən gözləyirəm ki, ATƏT-in yeni təklifləri olacaqdır. Bu barədə demək hələlik bir az tezdir, olmalıdır. ATƏT bu məsələ ilə məşğuldur və şübhəsiz ki, münaqişənin həllində fəal iştirak etməlidir. Yenə də deyirəm, özünü müşahidəçi kimi aparmamalıdır. Yeni təkliflər verməlidir. Bilirsiniz ki, bu təkliflərin irəli sürülməsi istiqamətində çox gözəl şərait yaranıbdır. Avropa İttifaqının məruzəsində artıq müsbət məqamlar səslənibdir. Avropa Şurasının sənədlərində artıq bizi qane edən, ədaləti əks etdirən məqamlar öz əksini tapıbdır. Yəni, bütün bunlar zəmindir. Biz Avropa Şurasında üç il bundan əvvəl bu fəaliyyətə başlayanda, bəziləri buna, necə deyərlər, ciddi yanaşmırdı. Hesab edirdilər ki, bu, sadəcə olaraq, siyasi gedişlərdir. Halbuki həyat göstərir ki, bütün bu məsələlər danışıqların istiqaməti üçün gözəl zəmindir. Mən əminəm ki, bu zəmində münaqişə öz həllini tapar. Əgər siz Rusiyanın qəzetlərinə nəzər salsanız, görərsinz ki, onların səhifələrində erməni işğalı haqqında artıq açıq-aydın bildirilir. Halbuki, bir neçə il əvvəl bu barədə heç deyilmirdi. Yəni bu, bizim diplomatik uğurumuzdur. Əminəm ki, bunun əsasında bizi qane edən bir variant ortaya çıxa bilər.

X X X

Azərbaycan Prezidenti İlham Əliyevi Binə hava limanında Milli Məclisin sədri Murtuz Ələsgərov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər qarşıladılar.