AZƏRBAYCAN RESPUBLİKASI ALİ MƏHKƏMƏSİNİN PLENUMU OLMUŞDUR
Ali Məhkəmənin sədri Ramiz Rzayev Plenumu açaraq, son illər ölkəmizdə bütün istiqamətlərdə, o cümlədən məhkəmə-hüquq sahəsində aparılan məqsədyönlü islahatlardan, “Azərbaycan Respublikası məhkəmələri hakimlərinin sayının artırılması və məhkəmələrin ərazi yurisdiksiyasının müəyyən edilməsi haqqında” Azərbaycan Prezidentinin 2006-cı il 17 avqust tarixli Fərmanının əhəmiyyətindən danışmışdır.
Ölkəmizdə sosial-iqtisadi inkişafın sürətlə getdiyi bir şəraitdə ədalət mühakiməsini həyata keçirərkən məhkəmələrin qarşısında duran vəzifələrdən danışan sədr xüsusi vurğulamışdır ki, məhkəmələrə vətəndaşların inamını artırmaq üçün hakim qanunun aliliyini daim rəhbər tutmalı və ədalətli qərar çıxarmalıdır. Hakimlər insanların taleyini həll etdiklərini heç vaxt unutmamalıdırlar. Məhkəməyə müraciət edənlər problemlərinin ədalətli həllinə əmin olmalıdırlar. Hakimi prosesdə kimin udub-uduzması yox, çıxardığı qərarın ədalətliliyi, qanunauyğunluğu maraqlandırmalıdır.
Plenumda Bakı şəhəri Binəqədi rayon məhkəməsində 2005-ci ildə baxılmış işlər barədə məlumat dinlənilmiş və müzakirə olunmuşdur. Çıxış edənlər bildirmişlər ki, bu məhkəmədə ədalət mühakiməsi həyata keçirilərkən qanunvericiliyin tələblərinə, əsasən, düzgün əməl olunmuşdur. Bununla yanaşı, bəzi işlər üzrə yekun məhkəmə aktlarının ləğv edilməsinə və dəyişdirilməsinə səbəb olan maddi və prosessual hüquq normaları pozulmuş və ya düzgün tətbiq olunmamış, cinayətin xarakterinə və ictimai təhlükəlilik dərəcəsinə uyğun olmayan cəzalar təyin edilmiş, təqsirləndirilən şəxslərin hüquqi tövsifində səhvlərə və s. nöqsanlara yol verilmişdir.
Plenum konkret mülki işlərə də baxmışdır.
Müzakirə olunan məsələyə və baxılan işlərə dair müvafiq qərarlar qəbul edilmişdir.
