AZƏRBAYCAN RESPUBLİKASI DÖVLƏT NEFT ŞİRKƏTİNİN “EKOLOGİYA İLİ”NƏ TÖHFƏLƏRİ DAVAM EDİR
Bakı, 3 aprel (AZƏRTAC). Azərbaycan Respublikası Prezidenti İlham Əliyev 2010-cu ili ölkəmizdə “Ekologiya ili” elan etməklə dövlətimizin ətraf mühitin mühafizəsi və əhalinin sağlamlığı məsələlərinə böyük diqqət yetirdiyini bir daha bütün dünyaya nümayiş etdirmişdir. Bu, son illərdə Azərbaycanda böyük vüsət alan ekoloji layihələrin məntiqi davamı kimi qiymətləndirilə bilər. Dövlətimizin başçısının müvafiq sərəncamlarına əsasən son illərdə ümumi sahəsi ölkə ərazisinin 3,1 faizinə bərabər olan milli parklar yaradılmış, qoruqların ərazisi genişləndirilmişdir. Prezident İlham Əliyevin 2006-cı il 28 sentyabr tarixli Sərəncamı ilə təsdiq edilmiş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”nda digər dövlət qurumları ilə yanaşı Dövlət Neft Şirkətinin də üzərinə mühüm vəzifələr qoyulmuşdur. Şirkət həmin vəzifələrin yerinə yetirilməsi istiqamətində məqsədyönlü iş aparır. Ötən müddətdə Azərbaycan Respublikası Dövlət Neft Şirkətinin (ARDNŞ) “Ekoloji siyasət”i qəbul olunmuşdur və nəzərdə tutulmuş tədbirlər müvəffəqiyyətlə həyata keçirilməkdədir.
Cari il fevralın 18-də Azərbaycan Respublikasının Prezidenti İlham Əliyevin yanında ekoloji problemlərə həsr olunmuş müşavirədə də ekoloji tarazlığın bərpa edilməsi, müxtəlif sahələrdə ekoloji tədbirlərin görülməsi, ətraf mühitin qorunması məsələləri vurğulanmış, qarşıda duran vəzifələr müəyyən olunmuşdur. Dövlətimizin başçısı bu nitqində ARDNŞ-in quru və dəniz mədənlərində ekoloji vəziyyətin sabitləşdirilməsi, Bakı buxtasının və neftlə çirklənmiş mədən torpaqlarının təmizlənməsi istiqamətində gördüyü işləri təqdir etmiş, qurum qarşısında yeni vəzifələr qoymuşdur. ARDNŞ yuxarıda qeyd olunan Kompleks Tədbirlər Planı çərçivəsində indiyədək bir çox layihələr həyata keçirmişdir. Bu baxımdan Bibiheybət mədən ərazisində mövcud çoxsaylı ekoloji problemlərin aradan qaldırılması, rekultivasiya və reabilitasiya layihələri xüsusi yer tutur. ARDNŞ-in idarə və müəssisələrinin kollektivləri mütəmadi olaraq neftlə çirklənmədən təmizlənmiş mədən ərazilərində, şirkətin zavodlarının və digər müəssisələrinin istehsalat sahələrində yaşıllaşdırma tədbirlərini davam etdirirlər. Bu mənada mədən torpaqlarının neftlə çirklənmədən tam təmizlənməsi, mədən ərazilərində yaşıllıq zolaqlarının salınması məsələləri davam etdiriləcək ekoloji tədbirlər sırasında mühüm yer tutur. “Ekologiya ili” gələcək nəsillər üçün sağlam mühitin qorunması istiqamətində Azərbaycanın hər bir vətəndaşının öz məsuliyyətini dərk etməsi sahəsində dönüş ili olmalıdır.
Azərbaycanda neftçıxarmanın, o cümlədən, dənizdə neftçıxarmanın tarixi qədimdir. Ötən dövrdə hasilat prosesləri zamanı çox vaxt ekoloji tələblər nəzərə alınmadığından ətraf mühitə ziyan vurulmuşdur. ARDNŞ-in əməkçiləri neftlə çirklənmənin acı nəticələrini aradan qaldırmaq istiqamətində əzmlə çalışırlar.
Qeyd etmək lazımdır ki, Prezident İlham Əliyevin onlarin işinə yüksək qiymət verməsi neftçiləri daha da ruhlandırmışdır. Onlar dövlətimizin başçısının Bakıda və Abşeronda 3 milyon ağac əkilməsi təşəbbüsünə qoşularaq, yeni mövsümdə ağacəkmə kampaniyasına artıq başlamışlar. Bu il fevralın 27-də keçirilmiş birinci iməcilikdə Bibiheybət NQÇİ-nin neftlə çirklənmədən təmizlənmiş torpaq sahələrində 2 minə yaxın, Qaz Emalı Zavodunun Salyan şosesində yerləşən ərazisində 2 min, Gəmi Təmiri Zavodunun ərazisində isə 500 ağac əkilmişdir. Martın 5-də ARDNŞ-in idarə və müəssisələrinin kollektivləri neftlə çirklənmədən təmizlənmiş mədən ərazilərində, eləcə də digər müəssisələrinin istehsalat sahələrində yaşıllaşdırma tədbirlərini davam etdirmişlər. Belə ki, ARDNŞ-in Ekologiya və Neft Kəmərləri İdarələrinin kollektivi “Azneft” İstehsalat Birliyinin “Qum adası” Neft və Qazçıxarma İdarəsinin ərazisindəki 3 nömrəli Ekoloji Ölçmə Məntəqəsinin sahəsində ümumilikdə 200-dən artıq ağac əkmişdir. Bundan başqa, Neft Kəmərləri İdarəsinin tərkibinə daxil olan müəssisələrin kollektivi də öz ərazilərində 500-dən çox ağac, 650-dən artıq qızılgül və dekorativ kol əkmişdir. Həmin gün “Bibiheybətneft” NQÇİ-nin neftdən təmizlənmiş ərazisində 200, Ə.Əmirov adına NQÇİ-nin Lökbatan qəsəbəsi ərazisində isə 750 ağac əkilmişdir. Əkilən ağaclar arasında ərazinin təbii xüsusiyyətlərinə uyğun olaraq zeytun, küknar və şam ağaclarına üstünlük verilmişdir. Martın 13-də şirkətin 5 mindən artıq əməkçisinin iştirak etdiyi sonuncu iməcilikdə ümumilikdə 14 min 200-ə yaxın ağac və gül kolu əkilmiş, böyük abadlıq işləri aparılmışdır. Bu ağaclar arasında ərazinin təbii xüsusiyyətlərinə uyğun bitkilərə - küknar, şam, sərv, Eldar şamı, zeytun, meyvə ağaclarına, eləcə də qızılgül və dekorativ gül kollarına üstünlük verilmişdir.
Qeyd olunmalıdır ki, 2010-cu ildə ARDNŞ yaşıllaşdırma tədbirləri çərçivəsində 150 min ağac, 16 min gül tingi əkməyi planlaşdırır. Ötən 3 ildə neft mədənlərinin təmizlənmiş ərazilərində 120 mindən çox ağac əkilmişdir. Onlara mütəmadi olaraq aqrotexniki qulluq göstərilir.
Bölmənin digər xəbərləri
