RƏSMİ XRONİKA
AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Hörmətli İlham Heydər oğlu!
Azərbaycanın milli bayramı - Respublika günü münasibətilə səmimi təbriklərimi qəbul edin.
Rusiya və Azərbaycanı tarixən dostluq və etimad telləri, sabitliyin və təhlükəsizliyin möhkəmləndirilməsinə olan ümumi maraqlar bağlayır. İkitərəfli münasibətlərin bu möhkəm prinsipləri uğurlu işgüzar əməkdaşlığın rəhni olub və olaraq qalır, bu prinsiplər əsas regional və dünya miqyaslı problemlərin həllinə ölkələrimizin oxşar yanaşmalarını bir çox cəhətdən müəyyənləşdirir.
Mühüm məqamdır ki, indi biz strateji tərəfdaşlığın daha da inkişaf etdirilməsi, onun yeni məzmunla dolğunlaşdırılması üçün birlikdə çalışırıq. Əminəm ki, Rusiya ilə Azərbaycan arasında mehriban qonşuluq əlaqələrinin böyük perspektivləri vardır.
Hörmətli İlham Heydər oğlu, Sizə möhkəm cansağlığı və Azərbaycan xalqının rifahı naminə işinizdə uğurlar, dost Azərbaycana isə sülh və firavanlıq diləyirəm.
Hörmətlə
Dmitri Medvedev
Rusiya Federasiyasının Prezidenti