Azərbaycan Respublikasının vətəndaşlığına qəbul edilmiş şəxslər and içiblər
Bakı, 30 mart, AZƏRTAC
Azərbaycan Respublikasının vətəndaşlığına qəbul və bərpa edilmiş şəxslərin Dövlət Miqrasiya Xidmətində (DMX) təntənəli andiçmə mərasimi keçirilib.
DMX-dən AZƏRTAC-a verilən məlumata görə, Azərbaycan Prezidentinin sərəncamları ilə vətəndaşlığa qəbul edilən şəxslərin andiçmə mərasimində Xidmətin Vətəndaşlıq məsələləri baş idarəsinin rəisi Rza Talıbov bildirib ki, Azərbaycan Prezidentinin 2008-ci il 6 mart tarixli Fərmanına müvafiq olaraq, Dövlət Miqrasiya Xidmətinin vətəndaşlıq məsələlərində iştirakı təmin edilib. Həmçinin Azərbaycan Respublikası Prezidentinin 2015-ci il 11 fevral tarixli Fərmanına əsasən, şəxsin Azərbaycan Respublikası vətəndaşlığına mənsubiyyətini müəyyənləşdirmək də bilavasitə DMX-nın vəzifəsi kimi müəyyən olunub.
Tədbirdə son illər Azərbaycanda həyata keçirilən islahatlar nəticəsində əldə edilən uğurlardan, beynəlxalq birliyin bərabərhüquqlu subyekti kimi sabitliyin yüksək səviyyədə təmin edildiyi, multikultural dəyərlərin hakim olduğu, tolerantlıq nümunəsi sayılan respublikamızın dünyanın siyasi, iqtisadi və mədəni mühitinə verdiyi töhfələrdən danışılıb. Azərbaycanda yaşamaq, işləmək, təhsil almaq, xüsusilə respublikamızın vətəndaşı olmaq istəyənlərin sayının ildən-ilə artdığı qeyd olunub.
Vətəndaşsızlıq hallarının aradan qaldırılması ilə bağlı ölkəmizdə görülmüş işlərə də nəzər salındığı görüşdə təkcə 2017-ci il ərzində 31 min 690 şəxsin vətəndaşlıq mənsubiyyətinin araşdırıldığı qeyd olunub. Bildirilib ki, 27 min 88 nəfərin Azərbaycan Respublikasının vətəndaşlığına mənsubiyyəti tanınıb. Onlar müvafiq dövlət qurumu tərəfindən Azərbaycan Respublikası vətəndaşının şəxsiyyətini təsdiq edən sənədlərlə təmin olunub.
Sonra vətəndaşlığa qəbul edilmiş 58 və bərpa olunmuş 2 şəxs dövlət bayrağı önündə Azərbaycan Respublikasının Konstitusiyasına əl basaraq, Azərbaycan Respublikasına sadiq olacaqları barədə təntənəli surətdə and içiblər.
Andiçmə “Azərbaycan Respublikasının vətəndaşlığı haqqında Qanun”a 2014-cü il 30 dekabr tarixdə əlavə edilmiş yeni məzmunda 151-ci maddəyə əsasən keçirilir.
And içən Azərbaycan Respublikasının vətəndaşı andın mətnini imzalayır və bu sənəd Dövlət Miqrasiya Xidmətində saxlanılır.
Tədbir dövlət himninin ifası ilə yekunlaşıb.
Bölmənin digər xəbərləri
