AZƏRBAYCAN SƏFİRİ “ORİYAT-DANO” RADİOSTANSİYASINA MÜSAHİBƏ VERMİŞDİR
Azərbaycanın Özbəkistandakı səfiri Aydın Əzimbəyov ölkədə çox populyar olan müstəqil “Oriyat-Dano” radiostansiyasının “Ambassador” proqramının qonağı olmuşdur. 50 dəqiqəlik bu verilişə ancaq ölkədə fəaliyyət göstərən səfirlər və beynəlxalq təşkilatların nümayəndələri dəvət edilirlər.
Aydın Əzimbəyov proqramda Azərbaycanla Özbəkistan arasında siyasi, iqtisadi və mədəni əməkdaşlığın inkişafı, ölkəmizdə aparılan iqtisadi islahatlar, neft sənayesinin bu günü və perspektivləri, o cümlədən Bakı-Tbilisi-Ceyhan əsas ixrac boru kəmərinin tikintisi və bir sıra digər məsələlərdən söhbət açmışdır.
Səfir Azərbaycan Prezidenti Heydər Əliyevin ABŞ-a sonuncu səfəri üzərində ayrıca dayanmışdır. Diplomat Azərbaycan və ABŞ dövlət başçılarının görüşünün əhəmiyyətini xüsusi vurğulamış, ölkələrimiz arasındakı əlaqələrin daha da genişləndiyini bildirmişdir.
Sonra Aydın Əzimbəyov canlı efirdə dinləyicilərin suallarına cavab vermiş, axırda isə Azərbaycan musiqisi səsləndirilmişdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
