AZƏRBAYCAN-TÜRKİYƏ ƏLAQƏLƏRİ DAİM İNKİŞAF EDƏCƏK
Milli Məclisin sədri qonağı səmimiyyətlə salamladıqdan sonra demişdir ki, Türkiyə Azərbaycanın dövlət müstəqilliyini tanıyan və ona yardım əlini uzadan ilk dövlətdir. Qardaş Türkiyə ilə əlaqələrin inkişafı bizim üçün xüsusilə vacibdir. Ümummilli liderimiz Heydər Əliyev bu əlaqələrin inkişafına müstəsna diqqət yetirmişdir. Onun “Bir millət, iki dövlət” kəlamı bu gün də Azərbaycan xalqı üçün böyük əhəmiyyət kəsb edir.
Sonra parlamentin rəhbəri dövlətlərimizin başçılarının qarşılıqlı səfərlərindən, bu səfərlər zamanı 500-dən artıq mühüm sənədin imzalanmasından və bu sənədlərin iqtisadi, siyasi, mədəni, elm və təhsil, səhiyyə və digər sahələrdə əlaqələrimizin inkişafındakı rolundan söhbət açaraq demişdir ki, əlaqələrimiz durmadan inkişaf edir. Bakı-Tbilisi-Ceyhan neft və Bakı-Tbilisi-Ərzurum qaz kəmərləri layihələrinin reallaşması iqtisadi əlaqələrimizin əsasını təşkil edir və onların daimiliyinə sübutdur.
Deputatlarımız da BMT, NATO PA, AŞ PA, ATƏT PA və digər beynəlxalq təşkilatlarda səmərəli əməkdaşlıq edirlər. Hər iki ölkənin parlamentində dostluq qrupları vardır. Bu qruplar arasında münasibətlərin daha da genişlənməsinə çalışacağıq.
Turan Moralı səmimi qəbula və xoş sözlərə görə minnətdarlığını bildirmiş, Oqtay Əsədovu Milli Məclisin sədri seçilməsi münasibətilə öz adından, Türkiyə Böyük Millət Məclisinin sədri adından təbrik etmiş, uğurlar arzulamışdır. O demişdir ki, Türkiyə tərəfi də qardaş ölkələrimiz arasında əlaqələrin inkişafında maraqlıdır. Bunu türkiyəli diplomatların, dövlət, hökumət və parlament üzvlərinin yaxın günlərdə Azərbaycana səfərlərində görmək olacaq. Biz Azərbaycanın problemlərini də başa düşürük və inanırıq ki, gələn il Ermənistan-Azərbaycan, Dağlıq Qarabağ münaqişəsinin həllində dönüş ili olacaqdır. Türkiyə bu problemin Azərbaycanı təmin edəcək şərtlər daxilində, onun ərazi bütövlüyü çərçivəsində həllini istəyir.
Sonra görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.
