Azərbaycan-Türkmənistan strateji tərəfdaşlığı iqtisadi əməkdaşlıq və tranzit potensialını gücləndirir
Bakı, 23 iyun, AZƏRTAC
Son illər türkdilli dövlətlər arasında siyasi və iqtisadi əməkdaşlığın daha da genişlənməsi müşahidə olunur. Azərbaycan ilə Mərkəzi Asiya respublikaları arasında tarixən mövcud olan dostluq və tərəfdaşlıq münasibətləri bu gün yeni məzmun qazanaraq regional iqtisadi inteqrasiyanın mühüm amillərindən birinə çevrilib.
Bu fikirləri AZƏRTAC-a açıqlamasında filologiya elmləri doktoru Arif Ağalarov səsləndirib. O bildirib ki, Azərbaycan-Türkmənistan münasibətləri ortaq tarix, mədəniyyət və milli dəyərlər üzərində formalaşıb və uzun illər ərzində davamlı inkişaf edib.
“Azərbaycanlılar və türkmənlər eyni kökə, ortaq mədəniyyətə və zəngin tarixi ənənələrə malikdirlər. Dil və din birliyi xalqlarımızı daha da yaxınlaşdırır. Mərkəzi Asiya xalqları arasında milli mənsubiyyət və dil baxımından Azərbaycan xalqına ən yaxın toplum türkmənlər hesab olunur. Sovet dövründə hər iki respublika arasında iqtisadi, elmi və mədəni əlaqələr yüksək səviyyədə inkişaf edib, müxtəlif sahələrdə birgə layihələr həyata keçirilib. Türkmənistanın neft-qaz yataqlarının geoloji tədqiqində azərbaycanlı mütəxəssislərin mühüm rolu olub, Azərbaycan isə qardaş ölkənin kənd təsərrüfatı və sənaye məhsulları ilə təminatında fəal iştirak edib”,- deyə A.Ağalarov vurğulayıb.
Onun sözlərinə görə, son illərdə iki ölkə arasında münasibətlər strateji tərəfdaşlıq səviyyəsinə yüksələrək nəqliyyat, logistika və enerji sahələrində yeni əməkdaşlıq imkanları yaradıb.
“Azərbaycan və Türkmənistan liderlərinin qarşılıqlı səfərləri siyasi dialoqu daha da möhkəmləndirib. Hər iki ölkə BMT, İslam Əməkdaşlıq Təşkilatı, Türk Dövlətləri Təşkilatı və digər beynəlxalq platformalarda ortaq maraqlara əsaslanan təşəbbüslərlə çıxış edir. Bu əməkdaşlıq iqtisadi əlaqələrin genişlənməsi üçün də əlverişli zəmin yaradır”, - deyə ekspert qeyd edib.
A.Ağalarov bildirib ki, Xəzər dənizinin hər iki sahilində yerləşən Azərbaycan və Türkmənistan Asiya ilə Avropa arasında mühüm nəqliyyat və logistika qovşaqları rolunu oynayır.
“Bu gün Çindən Türkmənistan limanlarına daşınan yüklər Azərbaycan üzərindən Bakı-Tbilisi-Qars dəmir yolu vasitəsilə Türkiyə və Avropa bazarlarına çatdırılır. Eyni zamanda, Cənub Qaz Dəhlizi gələcəkdə Türkmənistan qazının Avropaya nəqlinə imkan yarada bilər. Bu, həm Avropanın enerji təhlükəsizliyinə töhfə verər, həm də Türkmənistanın yeni ixrac bazarlarına çıxışını təmin edər”, - deyə o bildirib.
Ekspert vurğulayıb ki, Azərbaycan və Türkmənistanın iştirak etdiyi TRACECA, Lapis Lazuli, Xəzər dənizi-Qara dəniz və Şərq-Qərb nəqliyyat dəhlizləri regionun tranzit imkanlarını artırmaqla yanaşı, ölkələrin iqtisadi gəlirlərinin şaxələndirilməsinə də xidmət edir: “Bu layihələr hər iki ölkənin qeyri-neft sektorunun inkişafına, ixrac potensialının genişlənməsinə və regionda etibarlı iqtisadi tərəfdaş imicinin möhkəmlənməsinə mühüm töhfə verir. Azərbaycan Asiya bazarlarına, Türkmənistan isə Avropa bazarlarına çıxış imkanlarını genişləndirərək qarşılıqlı iqtisadi fayda əldə edir”.
Bölmənin digər xəbərləri
