Azərbaycan və ABŞ arasında əqli mülkiyyət sahəsində əməkdaşlığın yeni mərhələsi başlanır
Bakı, 2 sentyabr, AZƏRTAC
Əqli Mülkiyyət Agentliyində ABŞ Ticarət Nazirliyinin Ticarət Hüququnun İnkişafı Proqramının (CLDP) nümayəndələri ilə görüş keçirilib.
Agentlikdən AZƏRTAC-a bildirilib ki, Aparat rəhbəri Xudayət Həsənli qonaqlara ölkəmizdə həyata keçirilən sosial-iqtisadi islahatlar çərçivəsində əqli mülkiyyət sahəsində aparılan institusional islahatlar barədə ətraflı məlumat verib.
Əqli mülkiyyət üzrə beynəlxalq ekspert və sahə üzrə tanınmış mütəxəssis olan Kamran İmanovun rəhbərlik etdiyi Agentlik Ümumdünya Əqli Mülkiyyət Təşkilatı (ÜƏMT) tərəfindən müasir çağırışlara cavab verən milli əqli mülkiyyət ofislərindən biri hesab olunur. CLDP nümayəndələrinə bildirilib ki, əqli mülkiyyətin idarəçiliyi sahəsində Azərbaycan təcrübəsinin Müstəqil Dövlətlər Birliyi (MDB) məkanında fəaliyyət göstərən digər milli patent ofisləri tərəfindən də tətbiq olunması barədə Avrasiya Patent Təşkilatı tərəfindən təşəbbüs qaldırılıb.
Görüşdə Agentliyin dəstəyi ilə Bakı Dövlət Universitetinin Hüquq fakültəsində Əqli mülkiyyət hüququ kafedrasının, Azərbaycan Memarlıq və İnşaat Universitetində isə Əqli mülkiyyət kafedrasının yaradıldığı və onların Agentlikdə filiallarının fəaliyyət göstərdiyi diqqətə çatdırılıb. Vurğulanıb ki, kafedralar əqli mülkiyyət üzrə mütəxəssis hazırlığına əhəmiyyətli töhfələr verir.
X.Həsənli ixtiraçılıq fəaliyyətinin stimullaşdırılması barədə ölkə Prezidentinin 2022-ci il 15 iyun tarixli Fərmanına uyğun olaraq Nazirlər Kabineti tərəfindən Patent Əməkdaşlıq Sazişi (PCT beynəlxalq sistemi) vasitəsilə xarici dövlətlərdə patentin alınması və onun ilk 3 il müddətinə qüvvədə saxlanılması üçün 2022-ci il 9 dekabr tarixli 439 nömrəli Qərar qəbul edildiyini deyib.
Görüşdə ABŞ nümunəsi əsasında MDB məkanında ilk dəfə Azərbaycanda əsərlərin könüllü qeydiyyat sisteminin tətbiq edildiyi, patentlərə və əmtəə nişanlarına əlçatanlığı asanlaşdıran 24/7 rejimində fəaliyyət göstərən PƏNAH elektron sisteminin, patentlər və qeydiyyatdan keçirilmiş əmtəə nişanlarına dair məlumatların toplanıldığı “Açıq reystrlər”in yaradılması, habelə sənaye mülkiyyəti obyektlərinin ekspertiza müddətlərinin azaldıldığı barədə də ətraflı məlumat verilib.
ABŞ Ticarət Nazirliyinin Kommersiya Hüququnun İnkişafı Proqramının hüquqşünas-məsləhətçisi xanım Jocelyn Steiner Azərbaycanda əqli mülkiyyətin inkişafı sahəsində görülən işlərdən məmnun qaldığını bildirib. O, əqli mülkiyyətin kommersiyalaşdırılması sahəsində ABŞ təcrübəsindən Azərbaycanda da faydalanmağın mümkünlüyünə toxunaraq, bu sahədə əməkdaşlığın önəmli ola biləcəyini söyləyib.
Qonaqlar hakimlərin və vəkillərin əqli mülkiyyətə dair biliklərinin artırılması məqsədilə birgə tədbirlərin keçirilməsində də maraqlı olduqlarını və bu sahədə kömək göstərə biləcəklərini deyiblər.
Görüşdə hakimlərin, vəkillərin və gömrük işçilərinin, habelə əqli mülkiyyət ixtisaslarına yiyələnən tələbələrin ABŞ-ın müvafiq qurumlarında təcrübə keçmələrinə dəstək göstərilməsi, əqli mülkiyyət sahəsində qarşılıqlı məlumat mübadiləsinin aparılması, birgə layihələrin və maarifləndirici tədbirlərin keçirilməsi, o cümlədən Azərbaycan Əqli Mülkiyyət Agentliyi ilə Amerika Ticarət Palatası (AmCham) arasında işgüzar əlaqələrin gücləndirilməsinin zəruriliyi və digər məsələlər barədə fikir mübadiləsi aparılıb.
Bölmənin digər xəbərləri
