AZƏRBAYCAN VƏRƏMLƏ MÜBARİZƏ ÜÇÜN REGİONAL MƏRKƏZ YARADILMASI TƏŞƏBBÜSÜ İRƏLİ SÜRMÜŞDÜR
Əli İnsanov QİÇS, Vərəm və Malyariya ilə Mübarizə Qlobal Fondunun Azərbaycana 6,5 milyon dollar məbləğində qrant ayırmasına kömək göstərdiyinə görə DST-nin rəhbərliyinə təşəkkürünü bildirmişdir. Vəsait immun çatışmazlığı virusuna yoluxmanın ölkədə yayılmasının qarşısını almağa yönəldiləcəkdir.
Nazirin sözlərinə görə, DST-nin ən çox sayda proqramlarının həyata keçirildiyi yeganə MDB ölkəsi olan Azərbaycanın bu beynəlxalq təşkilatla uğurlu əməkdaşlığı səhiyyə sistemində islahatlar aparılması, bir sıra yoluxucu xəstəliklərin aradan qaldırılması sahəsində müsbət nəticələr vermişdir. Belə ki, 1990-cı illərin əvvəlləri ilə müqayisədə, malyariyaya yoluxma halları 27 dəfə azalmış, poliomielitin kökü tamamilə kəsilmişdir, vərəmlə mübarizədə xeyli irəliləyiş müşahidə olunur.
Cənab Mark Danzon ölkəmizdə səhiyyə sahəsində aparılan islahatları yüksək qiymətləndirərək demişdir kİ, DST sağlam həyat tərzinin təbliğinə, aztəminatlı əhalinin yüksək səviyyəli tibbi yardım və dərman preparatları ilə təmin olunmasına dair layihələri Azərbaycanla gələcək əməkdaşlığın öncül istiqamətləri kimi müəyyənləşdirmişdir. Azərbaycanın bu sahədə təcrübəsi keçid iqtisadiyyatlı digər ölkələrdə də yayılacaqdır. O, ümidvar olduğunu bildirmişdir kİ, Azərbaycan yaxın gələcəkdə DST-dən yardım alan ölkədən, onun donorlarından birinə çevriləcəkdir.
