AZƏRBAYCAN XOKKEYÇİLƏRİ BEYNƏLXALQ XOKKEY FEDERASİYASININ QƏRARINI GÖZLƏYİR
Bakıda qadınlar arasında keçirilmiş otüstü xokkey üzrə lisenziya xarakterli beynəlxalq turnir zamanı İspaniya yığmasının iki üzvündən götürülmüş analizin nəticələri öz təsdiqini tapmışdır.
Azərbaycan Otüstü Xokkey Federasiyasının mətbuat xidmətindən AZƏRTAC-a bildirmişlər ki, Beynəlxalq Xokkey Federasiyası (FİH) bununla bağlı yaydığı bəyanatda ispaniyalıların qadağan olunmuş dərman preparatından istifadə etməsi təsdiqlənmişdir. Az öncə adları açıqlanmayan iki xokkeyçidən götürülən analizin A testi müsbət nəticə vermişdir. Laboratoriyada təkrar analiz aparılarkən ispaniyalı oyunçuların Bakıda həqiqətən dopinqdən istifadə etdikləri bir daha təsdiq edilmişdir.
FİH rəhbərliyinin İspaniyanın qadınlardan ibarət otüstü xokkey yığması ilə bağlı iyunun 24-də hansı qərarı verəcəyi hələlik məlum deyil. Lakin Azərbaycan Otüstü Xokkey Federasiyası bu qərarın ədalətli olacağına inanır.
Qeyd edək ki, İspaniya milli komandasının lisenziyası ləğv edildiyi təqdirdə Azərbaycanın otüstü xokkey üzrə qadınlardan ibarət yığma komandası Pekin Olimpiadasında iştirak etmək şansı əldə edəcəkdir.
Bölmənin digər xəbərləri
