RƏSMİ XRONİKA
AZƏRBAYCAN-YAPONİYA İQTİSADİ FORUMU
AZƏRBAYCAN PREZİDENTİ İLHAM ƏLİYEV FORUMDA İŞTİRAK ETMİŞDİR
AZƏRTAC-ın xüsusi müxbiri xəbər verir ki, martın 8-də Tokionun “İmperial” mehmanxanasında Azərbaycan-Yaponiya iqtisadi forumu keçirilmişdir.
Forumun iştirakçıları Azərbaycan Prezidenti İlham Əliyevi hərarətli alqışlarla qarşıldılar.
Müxtəlif sahələri təmsil edən Azərbaycandan 30-dək, Yaponiyadan isə 100-ə yaxın şirkətin nümayəndələrinin iştirak etdikləri forumda çıxış edən Yaponiya İnvestisiyalarının Təşviqi Agentliyinin (JETRO) vitse-prezidenti Yoşitada Takahaşi dedi ki, 1991-ci ildə Azərbaycan dövlət müstəqilliyini əldə etdikdən sonra bu dost ölkə ilə yaxşı münasibətlərimiz qurulmuşdur və bir çox istiqamətlərdə, o cümlədən iqtisadi sahədə əməkdaşlıq uğurla həyata keçirilir. Azərbaycanda qeyri-neft sektorunun inkişafı sahəsində müxtəlif proqramların həyata keçirilməsində Yaponiya şirkətləri də iştirak edirlər. JETRO Azərbaycanın iqtisadi potensialı ilə bağlı araşdırmalar aparmaq, seminarlar keçirmək və öz mütəxəssislərini göndərmək niyyətindədir.
Sonra Azərbaycan Prezidenti İlham Əliyev forumda nitq söylədi. Dövlətimizin başçısı dedi ki, ümid edirəm bu forum iki ölkə arasındakı münasibətlərin inkişafına öz töhfəsini verəcəkdir. Həyata keçirilmiş islahatlar nəticəsində Azərbaycan sürətlə inkişaf edir. Ötən il iqtisadi inkişaf səviyyəsinə görə dünyada 1-ci yeri tutmuşdur. Yaponiya şirkətləri ilə əməkdaşlığımız ilk növbədə enerji sektorunda həyata keçirilir və onlar bu sahəyə yüz milyonlarla dollar sərmayə qoymuşlar. İndi başqa sahələrdə, xüsusilə qeyri-neft sektorunda əməkdaşlıq üçün yaxşı imkanlar vardır. Regionların inkişafı indi Azərbaycan üçün prioritet istiqamətdir. İstərdik ki, Yaponiya şirkətləri də bu prosesdə iştirak etsinlər. Qeyri-neft sektorunun inkişaf etdirilməsi üçün müxtəlif sahələrə yeni texnologiyaların gətirilməsinə ehtiyac vardır. Yaponiya şirkətlərinin bu texnologiyaların tətbiqinə cəlb olunmasını çox istərdik.
Prezident İlham Əliyev kənd təsərrüfatı, təhsil, səhiyyə sahəsində ölkəmizdə konkret proqramlar həyata keçirildiyini söyləyərək dedi ki, xarici şirkətlərlə birgə investisiya proqramlarının reallaşdırılması üçün 2006-cı ildə böyük həcmdə vəsait ayrılmışdır. İstərdik Yaponiyanı təmsil edən şirkətlər də bu sahədə fəal iştirak etsinlər. Azərbaycan dövləti bu proqramların həyata keçirilməsində iştirak etdiyi üçün investisiyaların təhlükəsizliyi kifayət qədər təminatlıdır. Hər kəs buna tam əmin ola bilər.
Dövlətimizin başçısı Yaponiya hökumətinin Azərbaycana uzun müddət texniki və digər sahələrdə yardımlar göstərdiyini xatırladaraq bildirdi ki, hazırda əməkdaşlığımızın daha fəal şəkildə həyata keçirilməsinə ehtiyac vardır.
Sonra forumda Azərbaycanın iqtisadi inkişaf naziri Heydər Babayev çıxış etdi. O, ölkəmizdə sosial-iqtisadi vəziyyətlə bağlı ətraflı məlumat verərək dedi ki, indiyədək Azərbaycanın neft-qaz sektoruna on milyardlarla dollar sərmayə qoyulmuşdur. Hazırda qeyri-neft sektorunun inkişafına xüsusi diqqət yetirilir. Azərbaycanda ictimai-siyasi sabitlik mövcuddur və sərmayə qoyuluşu üçün gözəl şərait yaradılmışdır. Yaponiya şirkətlərinin Azərbaycanda fəaliyyət göstərməsi bizim üçün çox əhəmiyyətlidir. İndiyədək bir sıra layihələrdə fəal iştirak edən şirkətlərdən savayı, digərləri də yeni yaranmış imkanlardan istifadə edib, ölkəmizə sərmayə qoya bilərlər.
Yaponiya ilə Azərbaycan arasında ticarət dövriyyəsinin həcminin dəfələrlə artdığını xatırladan nazir Yaponiya mallarının Azərbaycana birbaşa gətirilməsi üçün bu forumun faydalı olacağını da vurğuladı. O, dedi ki, bizim dövlət siyasətimiz əməkdaşlığa istiqamətlənmişdir. Yaponiya şirkətlərinin investisiya imkanları yüksəkdir və biz onların sərmayələrinin Azərbaycana cəlb olunmasında maraqlıyıq.
Sonra Azərbaycanı və Yaponiyanı təmsil edən şirkətlərin nümayəndələri çıxış etdilər, öz fikir və təkliflərini bildirdilər. Forumun nəticəsi olaraq, hər iki ölkəni təmsil edən bəzi şirkət arasında bir neçə milyon dollarlıq müqavilələr imzalandı.