AZƏRBAYCAN YIĞMA KOMANDASI DAHA BİR OLİMPİYA LİSENZİYASI QAZANMIŞDIR

15.03.2004 [17:49]
Çap et
A⁺ A^-

Yunan-Roma güləşi üzrə Azərbaycan yığma komandası martın 13-14-də Daşkənddə keçirilən “A” kateqoriyalı sonuncu olimpiya lisenziya turnirində iştirak etmişdir.

AZƏRTAC-ın xüsusi müxbiri xəbər verir ki, yarışlarda ölkəmizi 4 idmançı – Rövşən Bayramov (55 kq), Vitali Rəhimov (60 kq), Xviça Biçinaşvili (84 kq), Elnur Qazıməhəmmədov (96 kq) təmsil etmişlər. Turnirin şərtlərinə görə, ilk dörd yeri tutan idmançılar bu il Afinada keçiriləcək Olimpiya oyunlarında iştirak hüququ qazanırdı.

Bu yarışlarda dördüncü yeri tutan Vitali Rəhimov (60 kq) həmin vəzifənin öhdəsindən gəlmişdir.

Xatırladaq ki, bu, yunan-Roma güləşi üzrə üçüncü olimpiya lisenziyamızdır. Bundan əvvəl lisenziyaları Fərid Mənsurov (66 kq) və Vüqar Aslanov (74 kq) qazanmışdılar. Sərbəst güləşçilərimizin isə 5 lisenziyası var.

Beləliklə, idmançılarımız indiyədək Afina Olimpiadasına ümumən 21 lisenziya qazanmışlar.