Azərbaycanda 240-a yaxın sümük iliyi transplantasiyası əməliyyatı icra edilib
Bakı, 5 sentyabr, AZƏRTAC
Talassemiya xəstəliyinin müalicəsində ən təsirli üsul sümük iliyi transplantasiyasıdır. Azərbaycanda bu əməliyyatlar 2014-cü ildən həyata keçirilir.
Bunu AZƏRTAC-a müsahibəsində Talassemiya Mərkəzinin Transplantasiya şöbəsinin müdiri, transplantasiya üzrə baş ekspert Nərgiz Əliyeva bildirib.
O deyib ki, indiyədək 240-a yaxın sümük iliyi transplantasiyası əməliyyatı uğurla icra edilib: “Pasiyent nə qədər gənc olarsa, sümük iliyi transplantasiyası ona bir o qədər uğurlu və effektiv təsir göstərir. Ancaq buradakı ən önəmli məsələlərdən biri uyğun donorun tapılmasıdır. Bacı-qardaş arasında uyğunluq 30 faiz hallarda təsadüf edir. 2023-cü ildən etibarən burada uyğun donoru tapılmayan pasiyentlər isə dövlət dəstəyi ilə transplantasiyanın təkmilləşdirmə proqramı çərçivəsində Türkiyəyə göndərilir və orada əməliyyat olunurlar”.
Ölkəmizdə talassemiya ilə mübarizə sahəsində görülən işlər və hədəflərlə AZƏRTAC-ın Səhiyyə Nazirliyinin Talassemiya Mərkəzindən hazırladığı reportajdan daha ətraflı məlumat ala bilərsiniz.
Bölmənin digər xəbərləri
