Azərbaycanda akkreditə olunmuş diplomatik korpusun Şuşa şəhərinə səfəri başlayıb
Füzuli, 9 iyul, AZƏRTAC
Azərbaycan Respublikasının Prezidenti İlham Əliyevin tapşırığına əsasən, xarici diplomatik korpusun nümayəndələrinin işğaldan azad edilmiş ərazilərə tanışlıq səfərlərinin təşkili davam etdirilir. İyulun 9-da Azərbaycanda akkreditə olunmuş diplomatik korpusun və beynəlxalq təşkilatların ümumilikdə 100-dən çox nümayəndənin Şuşa şəhərinə səfəri təşkil olunub.
AZƏRTAC xəbər verir ki, səfərdə Türkiyə, Pakistan, İtaliya, Avstriya, İsveç, Polşa, İsrail, Çin, Yaponiya, Malayziya, Cənubi Koreya, Belarus, Ukrayna, Braziliya, Meksika, Səudiyyə Ərəbistanı, Qətər, Əlcəzair və digər ölkələrin səfirləri, həmçinin BMT-nin Qaçqınlar üzrə Ali Komissarlığının, Ümumdünya Səhiyyə Təşkilatının nümayəndələri iştirak edirlər.
Səfərdə məqsəd xarici diplomatları Şuşa şəhərində həyata keçirilən bərpa və yenidənqurma işləri, Şuşa şəhərinin orijinal memarlıq üslubu və Azərbaycan xalqının milli-mədəni irsi ilə tanış etməkdir.
Səfər qısa zamanda inşa olunan Zəfər yolu ilə həyata keçiriləcək, həmçinin diplomatlar Füzuli Beynəlxalq Hava Limanı, “Füzuli” yarımstansiyası ilə tanış olacaqlar.
Xatırladaq ki, indiyədək xarici diplomatların işğaldan azad olunmuş ərazilərə, o cümlədən Ağdam, Füzuli, Cəbrayıl, Zəngilan, Qubadlı, Laçın rayonlarına səfərləri təşkil olunub. Onlar işğal dövründə erməni vandalizminin nəticələri, həmçinin hazırda həyata keçirilən bərpa və yenidənqurma işləri ilə tanış olublar.
Bölmənin digər xəbərləri
