Azərbaycanda qoz bağlarının güzəştli şərtlərlə sığortası başlayır – Şərtlər, qiymətlər
Bakı, 10 mart, AZƏRTAC
Azərbaycanda kütləvi şəkildə əkilən daha bir bitkinin - qoz bağlarının dövlət dəstəyi ilə sığortalanması başlayıb.
Aqrar Sığorta Fondunun məlumatına görə, qoz bağı təsərrüfatlarının sahibləri bağlarını 50 faiz güzəştli şərtlərlə sığorta edə bilərlər.
Fonddan AZƏRTAC-a bildirilib ki, 2024-cü ilin rəsmi məlumatlarına əsasən, Azərbaycanda qoz bağlarının ümumi əkin sahəsi 7000 hektara çatır. Bura, həmçinin son illər xüsusilə artan intensiv və superintensiv bağlar da daxildir.
Qoz bağlarının 40 faizdən çoxu, təqribən 3 min hektarı Şəki-Zaqatala iqtisadi rayonunda yerləşir. Quba-Xaçmaz iqtisadi rayonunda qoz bağlarının sahəsi 1 335 hektar, Dağlıq Şirvan iqtisadi rayonunda 776 hektar təşkil edir.
Son illər ölkədəki qoz bağlarının sahəsi genişlənməkdədir. İstiyə tələbkar, eyni zamanda, quraqlığa, sərt iqlim şərtlərinə, şaxtaya davamlı qoz bitkisinin əkin sahəsində təkcə 2024-cü ildə 210 hektar artım qeydə alınıb.
Qoz bağlarına fermerlərin marağının artması və bu sahəyə yatırılan investisiyaların artımı bağların çoxsaylı risklərdən sığortalanmasını da zəruri edir. Azərbaycanda dövlət dəstəyi ilə tətbiq edilən aqrar sığorta mexanizmi vasitəsilə sığortalana bilən 41 bitki arasında qoz məhsulu da var.
Aqrar sığorta qoz bağlarını, dolu, fırtına, qasırğa, subasma, vəhşi heyvan hücumu, 3-cü şəxsin hərəkəti və sair hadisələrdən sığorta edir.
Artıq qoz bağlarına dəyən zərərlər üzrə ödənişlər də başlayıb. Belə ki, 2024-cü ildə Şəki-Zaqatala regionunda baş vermiş hadisələr və qoz bağlarına dəyən zərərə görə Aqrar Sığorta Fondu tərəfindən fermerlərə 20 161 manat sığorta ödənişi olunub. Bu ödənişlər fırtına, qasırğa, sel-subasma kimi hadisələr üzrə edilib.
Sığorta haqqının yarısı dövlət tərəfindən ödənildiyinə görə, fermerlər cüzi ödənişlə bağlarını sığorta edə bilərlər. Belə ki, Quba-Xaçmaz regionunda fermer 1000 manatlıq qoz məhsulunun sığortalanması üçün 10 manat, Şəki-Zaqatalada 19 manat, Dağlıq Şirvan regionunda isə 17 manat sığorta haqqı ödəməlidir.
Qeyd edək ki, fermerlər qoz bağında gözlənilən məhsulla yanaşı, ayrıca olaraq ağacları və tingləri də olduqca sərfəli şərtlərlə sığorta edə bilərlər. Hazırda meyvə bağlarının sərfəli şərtlərlə sığortalanması davam edir. Təsərrüfatını sığortalamaq istəyən fermerlər Aqrar Sığorta Fondunun 1651 Çağrı mərkəzinə müraciət etməlidirlər.
Fermerlər aqrar sığorta məhsulları, sığorta şərtləri və sair məlumatları Aqrar Sığorta Fondunun www.asf.gov.az rəsmi veb-saytından, 1651 Çağrı mərkəzindən, Fondun bölgələrdə yerləşən filiallarından öyrənə bilərlər.
Bölmənin digər xəbərləri
