“Azərbaycanda üzümçülük: nəticələr, perspektivlər” mövzusunda onlayn elmi-praktik konfrans keçirilib
Gəncə 30 avqust, Rauf Hacıyev, AZƏRTAC
Azərbaycan Dövlət Aqrar Universiteti (ADAU), Kənd Təsərrüfatı Nazirliyinin Meyvəçiliyin, üzümçülüyün təşkili və monitorinqi şöbəsi, Üzümçülük və Şərabçılıq Elmi-Tədqiqat İnstitutu və “Az-Granata” MMC-nin birgə təşkilatçılığı, AMEA Naxçıvan bölməsinin, Şamaxı Dövlət Aqrar İnkişaf Mərkəzinin nümayəndələrinin və təcrübəli üzümçü fermerlərin iştirakı ilə “Azərbaycanda üzümçülük: nəticələr, perspektivlər” mövzusunda onlayn elmi-praktik konfrans keçirilib.
Konfransın məqsədinin Prezident İlham Əliyevin 2011-ci il 15 dekabr tarixli Sərəncamı ilə təsdiq edilmiş “2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı”nın müvafiq bəndlərindən irəli gələn vəzifələrin yerinə yetirilməsi vəziyyətinin müzakirəsi, sahənin inkişafı məqsədilə həyata keçirilən sistemli tədbirlərin qiymətləndirilməsi və elmi cəhətdən əsaslandırılmış təkliflərin verilməsindən ibarət olduğu diqqətə çatdırılıb.
ADAU-nun rektoru, AMEA-nın müxbir üzvü, professor İbrahim Cəfərov çıxış edərək Dövlət Proqramının icrası müddətində universitetdə, o cümlədən Aqronomluq fakültəsində və Tədris-təcrübə təsərrüfatında üzümçülük istiqamətində görülmüş işlər barədə məlumat verib. O, ADAU-da kadr hazırlığı məsələləri və fermerlərə göstərilən Aqrar Məsləhət Xidmətindən geniş bəhs edib. Azərbaycanda üzümçülük sahəsində xidmətləri olan alimlər haqqında danışaraq, üzümçü alim, professor Famil Şərifovun xatirəsini dərin hörmətlə yad edib.
Növbəti çıxışda Kənd Təsərrüfatı Nazirliyinin Meyvəçiliyin, üzümçülüyün təşkili və monitorinqi şöbəsinin müdiri Tofiq Rzayev Dövlət Proqramının yekunlarını özündə əks etdirən məlumatları statistik rəqəmlərlə diqqətə çatdırıb, subsidiyalaşma prosesinin mahiyyətindən və tingçilik təsərrüfatlarının əhəmiyyətindən danışıb.
Məruzəçilərdən Üzümçülük və Şərabçılıq Elmi-Tədqiqat İnstitutunun direktoru, aqrar elmlər doktoru Vüqar Səlimov qlobal iqlim dəyişmələri şəraitində Dağlıq Şirvan zonasında dəmyə üzümçülüyünün qarşılaşdığı problemlərdən, institutda görülmüş işlərdən bəhs edib, gələcəkdə əməkdaşlığın inkişaf etdirilməsinin vacibliyini vurğulayıb.
Sonra AMEA Naxçıvan Bölməsinin Bioresurslar İnstitutunun Meyvə, tərəvəz və üzümçülük laboratoriyasının rəhbəri, aqrar elmlər doktoru Varis Quliyev Naxçıvanın yerli üzüm sortları, yeni salınmış üzüm bağları haqqında geniş məlumat verib, sortların beynəlxalq kodlaşdırma əsasında qeydiyyatı, çap olunmuş Ampeloqrafiya kitabı və genofond barədə təqdimat edib.
Tədbirdə çıxış edən “Az-Granata” MMC-nin direktoru, texnika elmləri doktoru Vüqar Mikayılov sənaye üzümçülüyünün inkişafı barədə fikirlərini çatdıraraq, alkoqolsuz şərab istehsalının təşviqi, şərabın qida məhsulu kimi qəbul olunması ilə bağlı təkliflərini səsləndirib.
Şirvan bölgəsindən konfransa qoşulan Şamaxı Dövlət Aqrar İnkişaf Mərkəzinin direktoru Etibar Muradlı mərkəzin əhatə etdiyi ərazidə üzümçülük sahəsində görülmüş işləri diqqətə çatdırıb. Mərkəzin təşkil etdiyi təlimlərdə iştirak edən peşəkar üzümçülər isə çoxillik təcrübələri və tövsiyələri əsasında tədbir iştirakçıları ilə maraqlı fikir mübadiləsi aparıblar.
Sonra Gəncə Üzümçülük və Şərabçılıq Təcrübə Stansiyasının direktoru, texnika üzrə fəlsəfə doktoru, dosent Mehman İsmayılov Dövlət Proqramının icrası müddətdə stansiyada görülən işlər barədə məruzə ilə çıxış edib.
ADAU-nun Bağçılıq kafedrasının müdiri, dosent Hüseyn İdrisov, kafedranın əməkdaşları, dosent Sevil Abduləliyeva və dosent Məhsəti Ələkbərova kafedranın əməkdaşları tərəfindən üzümçülüyə dair son illərdə çap olunmuş dərslik, dərs vəsaiti, terminlər lüğəti və sair materiallar haqqında məlumat veriblər.
Sonda konfrans iştirakçılarının qarşılıqlı marağına səbəb olan suallar ətrafında müzakirələr aparılıb.
Bölmənin digər xəbərləri
