“Azərbaycanfilm” kinostudiyasının həyata keçirdiyi Xəzər dənizi layihəsinə yekun vurulmuşdur
Bakı, 5 noyabr (AZƏRTAC). Mədəniyyət və Turizm Nazirliyinin dəstəyi ilə C.Cabbarlı adına “Azərbaycanfilm” kinostudiyasının həyata keçirdiyi Xəzər dənizi layihəsinə yekun vurulmuşdur.
Kinostudiyadan AZƏRTAC-a bildirmişlər ki, ilkin mərhələdə ssenari müsabiqəsi çərçivəsində gənclər fərdi, yaxud yaradıcı qrup olaraq 10-dan çox layihə ilə müraciət etmişlər.
Layihələrin qiymətləndirilməsi üçün xarici ölkələrdən prodüser və mütəxəssislər dəvət olunmuşdur.
Layihənin mahiyyəti ssenari müəllifi (rejissor, ssenarist) ilə prodüser arasında birbaşa əlaqə yaratmaqdan ibarətdir. Müəyyən olunmuş zaman çərçivəsində müəllif öz ssenarisini təqdim edir və sonra ssenarinin müzakirə və analizinə keçilir. Bu zamanı layihənin zəif nöqtələri aşkarlanır və təkmilləşməyə ehtiyac duyulan hissələr qeyd olunur.
Bu praktika beynəlxalq kino bazarına rəqabətə davamlı film layihələrinin təqdim edilməsi üçün geniş tətbiq olunur. Xəzər Dənizi layihəsinin başlıca məqsədi də məhz gənclərdə bu bacarıqların inkişaf etdirilməsidir.
Təcrübəli münsiflər heyəti tərəfindən üç layihə bəyənilmişdir.
Bölmənin digər xəbərləri
