AZƏRBAYCANIN ALMANİYADAKI SƏFİRLİYİNDƏ GİMNAZİYA MƏZUNLARI İLƏ GÖRÜŞ OLMUŞDUR
Berlinin Rikert gimnaziyası bu il təhsillərini başa vurub ali məktəblərə üz tutan məzunlarının dünyanın yeni dövlətləri barədə bilik və məlumatlarını artırmaq istəyini nəzərə alaraq bir sıra ölkələrin Almaniyadakı səfirliklərinə müraciət edərək, bu işdə yardımçı olmağı xahiş etmişdir.
AZƏRTAC-ın Almaniyadakı xüsusi müxbiri xəbər verir ki, gimnaziyaçı gənclər aprelin 7-də Azərbaycanın Berlindəki səfirliyinin qonağı olmuşlar. Səfir Hüseynağa Sadıqov onlara müstəqil Azərbaycan dövlətinin tarixi, ərazisi, əhalisi, sərhədləri, dövlət quruluşu, dövlətçiliyinin inkişaf mərhələləri, ölkəmizin füsünkar təbiəti, zəngin yeraltı və yerüstü sərvətləri haqqında ətraflı məlumat vermişdir. Qonaqlar “Odlar yurdu Azərbaycan” filminə baxmış, xəritələr və digər sənədlər vasitəsilə ölkəmizlə tanış olmuşlar.
Diplomatlarımız görüş iştirakçılarının Azərbaycan haqqında, ölkəmizdəki etnik azlıqlar və dini konfessiyalarla bağlı suallarına ətraflı cavab verdilər.
Alman gimnaziyaçılarına Nazim İbrahimovun “Qürbətdə vətən” kitabı və Azərbaycan haqqında məlumat kitabları və bukletlər hədiyyə edildi.
Məzunlar və onları görüşdə müşayiət edən gimnaziya rəhbərliyinin nümayəndələri səmimi qəbula və məzmunlu məlumata görə Azərbaycan diplomatlarına təşəkkürlərini bildirdilər.
Yusif Xəlilov
AZƏRTAC-ın xüsusi müxbiri
Berlin
Bölmənin digər xəbərləri
