AZƏRBAYCANIN AVARÇƏKMƏ YIĞMASININ ÜZVLƏRİ DÜNYA KUBOKUNUN II MƏRHƏLƏSİNDƏ YARIMFİNALA VƏSİQƏ QAZANMIŞLAR
Almaniyanın Duysburq şəhərində kayak və kanoe üzrə Dünya Kubokunun II mərhələsi start götürmüşdür.
Azərbaycan Milli Avarçəkmə Federasiyasının mətbuat xidmətindən AZƏRTAC-a bildirmişlər ki, 35 idmançının çıxış etdiyi yarışda ölkəmizi yığma komanda təmsil edir.
İdmançılarımız həm kayak, həm də kanoe növlərində yalnız 500 metr məsafəni qət etmək uğrunda mübarizəyə qatılmışlar. Seçmə mərhələdə kayakçılar Fikrət Zeynalov 1 nəfərlik qayıqda öz yarımqrupunda 9 iştirakçı arasında 8-ci yeri tutmuşdur. Bu nəticə ilə idmançı yarımfinala vəsiqə qazana bilməmişdir.
İkinəfərlik qayıqda isə Fikrət Zeynalov - Elmar Məmmədov dueti növbəti mərhələyə çıxmağı bacarmışlar. Onlar 7 iştirakçı arasında sonuncu olsalar da, reqlamentə əsasən, yarımfinalda çıxış etmək imkanı əldə etmişlər.
Kanoeçilərimiz Valentin Demyanenko və Aleksandr Kasatkinin əvvəlcədən ikinəfərlik qayıqda çıxışı nəzərdə tutulsa da, sonradan onların ayrı-ayrılıqda birnəfərlik qayıqda çıxışları daha münasib sayılıb. Nəticədə seçmə mərhələdə V.Demyanenko 7 idmançı arasında 3-cü, A.Kasatkin isə 5-ci olub. Hər iki kanoeçimiz yarımfinala vəsiqə qazanmışdır.
Yarışlara iyunun 15-də yekun vurulacaqdır.
Bölmənin digər xəbərləri
