Azərbaycanın bank sistemi yaxşı örnəkdir
Bakı, 14 noyabr, Əziz Məmmədov, AZƏRTACBu gün biz MDB ölkələrinin VII Bakı Beynəlxalq Bank Konfransını keçiririk. Çox yaxşı haldır ki, burada sabitlik hökm sürür. Avropa və Asiya banklarının çoxlu nümayəndəsi gəlib. Həm iqtisadi, həm də inteqrasiya effekti ildən-ilə artır. Bu səmərəli meydan sayəsində burada həm dövlətlər, həm banklar, həm də biznes-şirkətlər təmsil olunublar. Yaxşı örnəyin olması xüsusilə sevindirir: bu, Azərbaycanın bank sistemidir. Buradakı dəyişikliklər maraq doğurur.
Bu sözləri AZƏRTAC-a eksklüziv müsahibəsində MDB Maliyyə-Bank Şurasının Əlaqələndirmə Şurasının sədri Anatoli Kazakov deyib. O bildirib ki, Azərbaycanın iqtisadiyyatı sürətlə inkişaf edir. Son on ildə ölkəmizin iqtisadiyyatına böyük sərmayələr yatırılıb.
A.Kazakov sonda deyib: “Bu gün istər Azərbaycanda, istərsə də Rusiyada kredit portfelləri sürətlə artır. Lakin depozit portfelləri geridə qalır, ona görə də boşluqlar yaranır və bu boşluqları doldurmaq lazımdır. Odur ki, bu fərq aradan qaldırılmalıdır. Aktivlərin keyfiyyəti məsələsi də gündəmdədir. Aktivlərin heç də hamısı yaxşı deyil, bunun üzərində işləmək lazımdır. Kredit kütləsinin həcmini artıranda da problemlər yarana bilər. Amma məsələnin müsbət tərəfini də qeyd etmək lazımdır. Biz ehtiyat edirdik ki, Azərbaycanın bank sistemi kapitalın 50 milyon manat həcmində sərt limitləşdirilməsinə davam gətirməyək, bankların çoxu ya bazardan çıxacaq, ya da birləşəcək. Lakin görürük ki, bu proses normal gedir. Mərkəzi bank bu prosesi yetərincə dəqiq tənzimləyir və biz heç ixtilaf müşahidə etmirik. Bu gün Azərbaycan Beynəlxalq Bankı ilə “Roseksimbank” əməkdaşlıq haqqında saziş imzalayıblar. Sənəd xarici iqtisadiyyat sahəsində banklar arasında əməkdaşlığı nəzərdə tutur. Qarşılıqlı limitlər açılıb. Bu isə layihələri birgə maliyyələşdirmək deməkdir. Bundan əlavə, Xəzər İqtisadi İttifaqının yaradılması barədə düşünmək lazımdır. Xəzəryanı ölkələrin prezidentləri bu yaxınlarda Həştərxana toplaşıblar. Bu məsələ orada qaldırılıb. Əlbəttə, siyasətçilər bu struktur barədə birinci növbədə düşünməlidirlər. Şəxsən mən qərargahın Bakıda yerləşməsinə tərəfdaram, çünki Azərbaycanın iqtisadiyyatı Cənubi Qafqazda ən güclü iqtisadiyyatdır və ölkəniz regionun maliyyə mərkəzidir. Bakıda keçirilən konfrans MDB ölkələrinin iqtisadiyyatının daha sürətli inkişafı, iqtisadiyyatın şaxələndirilməsi sahəsində fikir mübadiləsinin aparılması üçün yaxşı platformadır. Buna görə də münasibətlərimizə şadam, hər şey yüksələn xətt üzrə gedir”.
Bölmənin digər xəbərləri
