Azərbaycanın baytar mütəxəssisləri Qazaxıstanda keçirilən beynəlxalq seminarda iştirak ediblər
Bakı, 4 aprel, AZƏRTAC
Qida Təhlükəsizliyi İnstitutunun İdarə Heyətinin sədr müavini Tamilla Əliyevanın rəhbərlik etdiyi nümayəndə heyəti Qazaxıstanda səfərdə olub. Nümayəndə heyəti səfər çərçivəsində Qazaxıstanın Almatı şəhərində Ümumdünya Heyvan Sağlamlığı Təşkilatının (ÜHST) keçirdiyi “Mərkəzi Asiya və Qafqaz ölkələri üçün Baytarlıq İşçi Qüvvəsinin inkişafı üzrə Regional Maarifləndirmə Seminarı”nda iştirak edib.
İnstitutun İctimaiyyətlə əlaqələr və maarifləndirmə departamentindən AZƏRTAC-a verilən məlumata görə, seminar ÜHST-yə üzv ölkələrdə işçi qüvvəsinə olan ehtiyacları nəzərdən keçirmək, adekvat və müvafiq işçi heyətin yaradılmasının vacibliyi barədə məlumatlılığı artırmaq, həmçinin baytar mütəxəssislərə töhfə verən amillər haqqında bilik və anlayışlar formalaşdırmaq məqsədilə təşkil edilib.
Tədbirdə ölkələrin baytarlıq kadrlarının qiymətləndirilməsi, onların düzgün balanslaşdırılmış bölgüsü və istifadəsi, baytarlıq təhsilinin planlaşdırılması, baytarlıq statuar orqanının yaradılması, baytarların və paraveterinarların vəzifə təlimatları və səlahiyyətləri, paraveterinarlara müəyyən funksiya və səlahiyyətlərin verilməsi imkanları, baytarlıq qanunvericiliyinin təkmilləşdirilməsi kimi məsələlər müzakirə olunub. Həmçinin bildirilib ki, ÜHST tərəfindən baytar mütəxəssislərin qiymətləndirilməsi və inkişafında üzv ölkələrə dəstək olmaq məqsədilə alətlər və yanaşmalar hazırlamaq üçün Baytarlıq İşçi Qüvvəsinin İnkişaf Proqramı irəli sürülüb. ÜHST üzv ölkələri baytar mütəxəssislərə olan ehtiyaclarını sistematik şəkildə qiymətləndirməyə, eləcə də üzləşə biləcəkləri maliyyə, insan və təhsil resursları məhdudiyyətləri çərçivəsində həmin ehtiyacların real şəkildə həllinə təşviq etmək niyyətindədir.
Seminarda Azərbaycanda baytar mütəxəssislərin yetişdirilməsi və işlə təmin olunması sahəsində həyata keçirilən tədbirlər, həmçinin heyvan sağlamlığı ilə əlaqədar görülən işlər və Qida Təhlükəsizliyi İnstitutunun nəzdində fəaliyyət göstərən laboratoriyalar, o cümlədən Mərkəzi Baytarlıq Laboratoriyası haqqında ətraflı məlumat verilib. Həmin laboratoriyalarda çalışan işçilərin, o cümlədən baytarların nəzəri və təcrübi biliklərinin artırılması sahəsində beynəlxalq təşkilatlarla qurulan sıx və səmərəli əməkdaşlıq əlaqələrindən danışılıb.
Səfər zamanı ölkəmizdən olan nümayəndə heyəti tədbirdə iştirak edən digər ölkələrin təmsilçiləri ilə də görüşlər keçirib və qarşılıqlı maraq doğuran məsələlər ətrafında fikir mübadiləsi aparılıb.
Bölmənin digər xəbərləri
