Bakı, 4 iyul, AZƏRTAC

Müasir dövrdə dövlətlərin inkişaf səviyyəsi yalnız iqtisadi göstəricilərlə deyil, həm də siyasi sabitlik, idarəetmənin səmərəliliyi, milli təhlükəsizliyin təmin olunması və cəmiyyətin dövlət institutlarına etimadı ilə qiymətləndirilir.

Prezident İlham Əliyevin rəhbərliyi ilə həyata keçirilən dövlət siyasəti Azərbaycanın daxili sabitliyinin möhkəmləndirilməsi, iqtisadi potensialının artırılması, beynəlxalq mövqeyinin gücləndirilməsi və milli maraqların təmin edilməsi istiqamətində yeni inkişaf mərhələsinin formalaşmasına səbəb olub. Son iki onillikdə həyata keçirilən ardıcıl islahatlar ölkənin sosial-iqtisadi inkişafına təkan verməklə yanaşı, dövlət idarəçiliyinin müasir çağırışlara uyğunlaşdırılmasına da imkan yaradıb. Medianın İnkişafı Agentliyinin (MEDİA) 2026-cı ilin birinci yarısında Prezident İlham Əliyevin fəaliyyətinə ölkə vətəndaşlarının münasibətini öyrənmək, bu sahədə dinamika və tendensiyaları təhlil etmək məqsədilə apardığı ictimai rəy sorğusu nəticələri dövlətimizin başçısına xalqın inam və etimadının növbəti parlaq ifadəsidir. Sorğunun nəticələrinə əsasən, Prezident İlham Əliyevə respondentlərin etimad səviyyəsi ümumilikdə 87,7 faiz təşkil edir. Bu göstərici ölkədə hər 10 nəfərdən təxminən 9-nun Prezident İlham Əliyevə etimad göstərdiyini təsdiq edir. Əlbəttə, bu rəy sorğusunun nəticələrinin kökündə dərin məna dayanır.

Bu fikri AZƏRTAC-a açıqlamasında Milli Məclisin deputatı Pərvin Kərimzadə bildirib.

Onun sözlərinə görə, son illərdə iqtisadiyyatın şaxələndirilməsi, qeyri-neft sektorunun inkişafı, regionların sosial-iqtisadi inkişaf proqramlarının icrası, infrastruktur layihələrinin genişləndirilməsi, rəqəmsal idarəetmə mexanizmlərinin tətbiqi və sosial müdafiə tədbirlərinin gücləndirilməsi dövlət siyasətinin prioritet istiqamətlərinə çevrilib. Bütün bunlar vətəndaşların rifah səviyyəsinin yüksəldilməsi ilə yanaşı, dövlət institutlarına olan inamın möhkəmlənməsinə də təsir göstərib. Digər mühüm amil isə ölkədə sabitliyin və təhlükəsizliyin təmin olunmasıdır. Müasir geosiyasi şəraitdə təhlükəsizlik faktoru dövlətlərin inkişafını müəyyən edən əsas göstəricilərdən biri hesab olunur. Azərbaycan son illərdə milli təhlükəsizlik sahəsində həyata keçirdiyi siyasət nəticəsində regionun ən sabit ölkələrindən biri kimi mövqeyini möhkəmləndirib. Daxili sabitliyin qorunması, dövlət institutlarının dayanıqlı fəaliyyəti və milli maraqların ardıcıl müdafiəsi iqtisadi inkişaf üçün də əlverişli zəmin formalaşdırıb. Bu gün Azərbaycan təkcə Cənubi Qafqazın deyil, bütövlükdə Avrasiya məkanının mühüm siyasi və iqtisadi aktorlarından biri kimi çıxış edir. Enerji təhlükəsizliyi sahəsində etibarlı tərəfdaş statusu, beynəlxalq nəqliyyat dəhlizlərinin inkişafında oynadığı rol və regional əməkdaşlıq təşəbbüslərində fəal iştirakı ölkənin geosiyasi əhəmiyyətini daha da artırıb. Xəzər hövzəsindən Avropa bazarlarına enerji resurslarının nəqlində Azərbaycanın rolu, eyni zamanda Şərq-Qərb və Şimal-Cənub nəqliyyat marşrutlarının inkişafına verdiyi töhfələr ölkənin strateji əhəmiyyətini gücləndirən amillər sırasındadır.

Prezident İlham Əliyevin siyasi fəaliyyətinin əsas xüsusiyyətlərindən biri qəbul edilən qərarların uzunmüddətli strateji hədəflərə hesablanmasıdır. Dövlət idarəçiliyində praqmatik yanaşma, milli maraqların prioritet kimi müəyyənləşdirilməsi və dəyişən beynəlxalq reallıqlara çevik uyğunlaşma Azərbaycanın regional siyasətdə mövqelərini gücləndirib. Bu yanaşma nəticəsində ölkə yalnız təşəbbüslərə qoşulan deyil, eyni zamanda regional əməkdaşlıq gündəliyini müəyyənləşdirən dövlətlərdən birinə çevrilib.

Son illərin geosiyasi prosesləri göstərir ki, Cənubi Qafqazda yaranan yeni reallıqlar fonunda Azərbaycanın mövqeyi daha da möhkəmlənib. Bu gün ölkənin irəli sürdüyü iqtisadi və siyasi təşəbbüslər regionun inkişaf perspektivlərinin formalaşmasında mühüm rol oynayır. Azərbaycanın tərəfdaş ölkələrlə qarşılıqlı maraqlara əsaslanan əməkdaşlıq modeli həm regional sabitliyə, həm də beynəlxalq iqtisadi inteqrasiyanın genişlənməsinə töhfə verir.

Bütün bunlar onu göstərir ki, Prezident İlham Əliyevin rəhbərliyi ilə həyata keçirilən siyasətin əsas nəticələrindən biri ölkədə güclü dövlət institutlarının formalaşdırılması, davamlı inkişaf modelinin yaradılması və cəmiyyətlə dövlət arasında qarşılıqlı etimadın möhkəmlənməsidir. MEDİA-nın son ictimai rəy sorğusu da bu proseslərin cəmiyyət tərəfindən necə qiymətləndirildiyini əks etdirən mühüm göstəricilərdəndir.

Prezident İlham Əliyevin yüksək liderlik keyfiyyətləri və qətiyyətli mövqeyi fonunda həyata keçirilən strateji kursun nəticəsində həm də çox mühüm geostrateji reallıqlar yaranıb. Bu reallıqlar, ilk növbədə, Azərbaycan dövlətinin gücününü göstəricisi olmaqla yanaşı, ölkəmizə tərəqqi, regiona rifah və inkişaf vəd edir. Azərbaycan Prezidentinin strateji təşəbbüsləri özündə həm tarixi ənənələri, həm mənəvi dəyərləri, həm siyasi reallıqları, həm də milli maraqları ehtiva edir. Bu amillər dünya ölkələrini də İlham Əliyev faktoru ilə hesablaşmağa təşviq edir. Prezident İlham Əliyevin dünya səviyyəli siyasi xadim olduğunu bir çox ölkələrin liderləri də etiraf edirlər. Dövlətimizin başçısının beynəlxalq münasibətlərə dair dərin bilikləri və çevik diplomatik manevrləri Azərbaycanın xarici siyasət kursunun uğurla həyata keçirilməsində mühüm əhəmiyyət kəsb edir. Azərbaycan beynəlxalq hüququn aliliyi, dövlətlərin ərazi bütövlüyü, suverenliyi və sərhədlərinin toxunulmazlığı prinsiplərinə sadiq qalaraq əməkdaşlığa daim açıq olduğunu nümayiş etdirib. Bu yanaşma Azərbaycanın beynəlxalq aləmdə söz sahibi kimi tanınmasını təmin edib və Prezident İlham Əliyevin irəli sürdüyü təşəbbüslərə geniş dəstək qazandırıb. Ötən illər ərzində beynəlxalq qurumlarla səmərəli əməkdaşlıq əlaqələri Azərbaycanın qlobal mövqeyinin möhkəmlənməsində mühüm əhəmiyyət kəsb edib. Azərbaycanın beynəlxalq nüfuzunu artıran mühüm hadisələrdən biri də COP29-a ev sahibliyi etməsi oldu. Qlobal iqlim gündəliyinin ən vacib platformalarından biri hesab olunan bu tədbirin Bakıda keçirilməsi beynəlxalq ictimaiyyətin Azərbaycana olan etimadının növbəti təsdiqi kimi qiymətləndirilə bilər. Bu tədbir ölkənin yalnız enerji ixracatçısı deyil, eyni zamanda yaşıl enerji keçidi, iqlim diplomatiyası və dayanıqlı inkişaf istiqamətində fəal iştirakçı olduğunu nümayiş etdirdi. Bununla yanaşı, Ümumdünya Şəhərsalma Forumunun Azərbaycanda keçirilməsi ölkənin müasir şəhərsalma, dayanıqlı inkişaf və postmünaqişə ərazilərinin bərpası sahəsində topladığı təcrübəyə beynəlxalq marağın artdığını göstərdi. Xüsusilə işğaldan azad olunmuş ərazilərdə həyata keçirilən “ağıllı şəhər” və “ağıllı kənd” layihələri Azərbaycanın müasir inkişaf modelinin mühüm elementlərindən biri kimi beynəlxalq platformalarda təqdim olundu. Bu gün Azərbaycanın beynəlxalq nüfuzu təkcə iqtisadi potensialı ilə deyil, həm də təşəbbüskar diplomatiyası, etibarlı tərəfdaş imici və milli maraqlara söykənən ardıcıl xarici siyasət kursu ilə xarakterizə olunur.

“Cənab İlham Əliyev dövlət başçısı seçildiyi ilk gündən bəyan edirdi ki, Ulu Öndərin siyasi kursunu dönmədən davam etdirəcək, hər bir vətəndaşın Prezidenti olacaq. Eyni zamanda, deyirdi ki, biz öz torpaqlarımızın işğalı ilə heç vaxt barışmayacağıq, Azərbaycan ərazilərində ikinci Ermənistan dövləti yaradılmasına yol verməyəcəyik. Bəli, Prezident bu taleyüklü vəzifənin də öhdəsindən layiqincə gəldi. Prezident İlham Əliyevin fəaliyyətinin ən parlaq səhifəsini Azərbaycanın ərazi bütövlüyünün və suverenliyinin bərpa olunması təşkil edir. Dünyanın hərb və siyasət tarixində xüsusi yer tutan, xalqımızın şanlı qəhrəmanlıq dastanı və Zəfər simvoluna çevrilən 44 günlük Vətən müharibəsi, Qarabağda erməni separatizminin kökünün kəsilməsi təkcə Azərbaycanın ərazi bütövlüyünün, suverenliyinin və tarixi ədalətin bərpasını deyil, eyni zamanda, həm Cənubi Qafqaz regionunda, həm də Avrasiyada yeni geostrateji reallıqların yaranmasına səbəb olub. Ölkəmiz tərəfindən irəli sürülən təşəbbüslər regional və beynəlxalq təhlükəsizliyə fundamental töhfə olmaqla yanaşı, Azərbaycanın qlobal arenada mövqeyinin daha da möhkəmlənməsini təmin edir. Eyni zamanda, işğaldan azad edilmiş ərazilərdə möhtəşəm quruculuq işlərinin aparılması, tarixi, dini və mədəni abidələrimizin bərpası regional inkişafın əhatə dairəsinin genişlənməsinə səbəb olmaqla yanaşı, milli tərəqqinin yeni mərhələsinə transformasiya deməkdir. Şanlı Zəfərin qazanılmasında ən başlıca amillərdən biri Lider-Xalq-Ordu birliyi oldu. Bu birlik və həmrəylik nəticəsində Prezident İlham Əliyev Müzəffər Ali Baş Komandan kimi adını Azərbaycanın tarixinə qızıl hərflərlə yazdırdı.

Prezident İlham Əliyev Azərbaycan siyasi sisteminə rasional siyasi davranış modeli, məntiqi mühakimələrə və analitik təhlilə əsaslanan, mütərəqqi, pozitiv, milli məqsədlərə xidmət edən siyasi realizmə söykənən siyasi fəaliyyət nümunəsi gətirib, öz fəaliyyəti və davranışı ilə siyasi sistemimizə siyasi mədəniyyət, milli siyasi etika nümunəsi təqdim edib. Prezident İlham Əliyevin rəhbərliyi dövründə Azərbaycan həm daxili idarəetmə, həm iqtisadi inkişaf, həm də xarici siyasət baxımından mühüm mərhələ keçib. Beləliklə, son illərin siyasi, iqtisadi və geosiyasi prosesləri göstərir ki, Azərbaycan yeni inkişaf mərhələsinə yalnız iqtisadi potensialını artırmış dövlət kimi deyil, həm də regional gündəliyə təsir göstərən, milli maraqlarını qətiyyətlə müdafiə edən və beynəlxalq münasibətlər sistemində mövqelərini ardıcıl şəkildə gücləndirən aktor kimi daxil olub. Bu inkişaf xətti dövlət idarəçiliyində müəyyən edilmiş strateji prioritetlərin uzunmüddətli perspektivdə də ölkənin inkişafının əsas istiqamətlərindən biri olacağını göstərir”, - deyə deputat fikrini yekunlaşdırıb.