“Azərbaycanın Lənkəran zonasının toponimləri” kitabı nəşr olunub
Lənkəran, 28 mart, Bağır Əliyev, AZƏRTAC
Filologiya elmləri doktoru, professor, Azərbaycan Yazıçılar Birliyinin üzvü Məsud Məmmədovun (Məsud Dövran) “Elm və Təhsil” nəşriyyatı tərəfindən “Azərbaycanın Lənkəran zonasının toponimləri” adlı irihəcmli elmi monoqrafiyası çapdan çıxıb.
AZƏRTAC-ın bölgə müxbiri xəbər verir ki, 448 səhifədən ibarət yeni kitabın məsul redaktoru filologiya elmləri doktoru, professor Nadir Məmmədli, rəyçilər filologiya elmləri doktoru, professor Qara Məşədiyev və tarix elmləri namizədi Leyla Məcidovadır.
Elmi əsər bütövlükdə Lənkəran ovalığının toponimiyasına həsr olunub. Kitabda Astara, Lənkəran, Lerik, Masallı və Yardımlı rayonlarının toponimləri leksik-semantik, eləcə də qrammatik cəhətdən araşdırılıb, bölgənin etnonim və toponimləri kompleks şəkildə tədqiq olunub.
Araşdırma bütövlükdə böyük elmi maraq doğurur. Monoqrafiya elmi işçilər və filologiya, coğrafiya və tarix fakültələrinin tələbələri, eləcə də geniş oxucu kütləsi üçün nəzərdə tutulub.
Bölmənin digər xəbərləri
