SİYASƏT
Azərbaycanın Qarabağ ermənilərinə göstərdiyi diqqət Avropa ölkələri üçün nümunə olmalıdır - ŞƏRH
![Azərbaycanın Qarabağ ermənilərinə göstərdiyi diqqət Avropa ölkələri üçün nümunə olmalıdır - ŞƏRH](/files/2023/3/1200x630/1697263260446774257_1200x630.jpg)
Bakı, 14 oktyabr, AZƏRTAC
Dünyada kolonializmin, etnik təmizləmənin əsasını qoyan dövlətlər bu gün Azərbaycanı beynəlxalq hüququ pozmaqda ittiham edirlər. Halbuki Azərbaycanın özü 30 il ərzində beynəlxalq hüququn pozulmasından ciddi əziyyət çəkib. Fransanın da himayə etdiyi Ermənistan uzun müddət BMT-nin qətnamələrini icra etməkdən yayınıb və Azərbaycanın 20 faiz torpağını işğal altında saxlayıb. Doğrudan da Prezident İlham Əliyevin qeyd etdiyi kimi, öz gözlərində tiri görməyən Avropa dövlətləri bizim gözümüzdə çöp axtarırlar. Onların anti-Azərbaycan siyasətləri, sadəcə, gülüş doğurur.
Bu sözləri AZƏRTAC-a açıqlamasında politoloq Ramiz Alıyev bildirib.
Politoloqun sözlərinə görə, BMT-nin İnsan Hüquqları Şurasında Azərbaycan əleyhinə bəyanata imza atan dövlətlər, xüsusilə də Fransa, Almaniya, ABŞ, İspaniya və digərləri müxtəlif dövrlərdə başqa ölkələrə və xalqlara qarşı dəfələrlə çoxsaylı cinayətlər törədiblər. “Fransanın Əlcəzairdə müsəlman olduqları üçün dinc insanlara qarşı törətdiyi soyqırımı insanlıq əleyhinə ən böyük cinayətlərdən hesab olunur. Bu gün də Fransa bəzi Afrika ölkələrində ordu saxlayır. Afrikada Fransa əleyhinə geniş etirazlar var. XXI əsrdə müstəmləkəçilik siyasəti yürüdən dövlətlərin Qarabağdan ermənilərin köçməsinin səbəbkarı kimi Azərbaycanı göstərməsi absurddur. Ermənilərin Qarabağdan köçməsinə səbəb uzun illər onlara təbliğ edilmiş etnik dözümsüzlüyün təsiridir. Ermənistan və hamiləri hər zaman ermənilərin reinteqrasiyasına mane olmağa cəhd ediblər. Ermənistanın keçmiş prezidenti Robert Köçəryan beynəlxalq tribunadan açıq bəyan edib ki, ermənilərlə azərbaycanlılar arasında etnik uyğunsuzluq var. Bu cür zehniyyət sahibləri uzun müddət bizim torpaqları işğal altında saxladılar, yüz minlərlə azərbaycanlını öz dədə-baba torpaqlarından qovdular və onların geri dönüşünə ciddi şəkildə mane oldular. O zaman beynəlxalq birlik buna etiraz etmədi, Ermənistan cəzalandırılmadı. BMT-nin İnsan Hüquqları Şurası ermənilərin qayıdış məsələsini müzakirə edir, amma Ermənistandan qovulmuş azərbaycanlıların qayıdış hüququna toxunmur. Bir milyona yaxın azərbaycanlı öz doğma torpaqlarından qovulub, hazırda onlardan cəmi bir neçə mini vətənə qayıdıb, yüz minlərlə insan hələ də məcburi köçkün həyatı yaşayır. Amma sənəddə onlar haqda heç nə deyilmir”, - deyə R.Alıyev qeyd edib.
Fransanın Cənubi Qafqazı öz təsiri altında saxlamaq üçün ermənilərdən alət kimi istifadə etdiyini vurğulayan politoloq Parisin ayrı-seçkiliyinin, Azərbaycanın ünvanına əsassız ittihamlarının bölgədə gərginliyi artırmaq və sülh prosesini pozmaq niyyətindən başqa bir şey olmadığını diqqətə çatdırıb. Deyib ki, heç kəs Azərbaycanı Qarabağda etnik təmizləmə aparmaqda ittiham edə bilməz. Qarabağdan Ermənistana köçən ermənilər vətəndaşı olduqları ölkədə yaşamaq istəyiblər. Bu mənada, hüquqi baxımdan onlara “qaçqın statusu” vermək doğru deyil.
“Azərbaycan dövləti Qarabağ ermənilərinin reinteqrasiyası ilə bağlı xüsusi sayt yaradıb. Orada reinterasiya şərtləri ilə bağlı qaydalar ətraflı izah olunub. Təbii ki, əsas şərt ermənilərin Azərbaycan hökumətini tanıması və vətəndaşlığımızı qəbul etmələridir. Azərbaycan dövləti özü maraqlıdır ki, ermənilər qayıdıb Qarabağda yaşasınlar. Sentyabrın 19-da Azərbaycanın öz ərazisində həyata keçirdiyi antiterror tədbirləri zamanı heç bir yaşayış binası, uşaq bağçası, məktəb, xəstəxana xəsarət görmədi, bir nəfər də olsun mülki erməni zərər çəkmədi. Qarabağdan köçüb getmək istəyən ermənilər müsahibələrində Azərbaycandan heç bir inciklik etmədilər. Təbii ki, biz könüllü şəkildə Qarabağı tərk edən erməniləri burada zorla saxlaya bilmərik. Qarabağdan getmiş etnik ermənilərin say məsələsi də mübahisəlidir. 100 min nəfər deyirlər. Bu, inandırıcı deyil. Qarabağı tərk edən ermənilərin 10 mindən çoxu Ermənistan silahlı qüvvələrinin hərbçiləri və onların ailə üzvləridir. Digərlərinin mütləq əksəriyyəti işğal zamanı burada qanunsuz məskunlaşmış şəxslərdir. Bu gün onları “qaçqın” kimi təqdim edən Fransa və digər Qərb ölkələri faktiki olaraq qanunsuz məskunlaşmaya bəraət qazandırırlar. Bu gün Qarabağda qalıb yaşayan ermənilər var, onlar üçün hər cür şərait yaradılıb. Azərbaycan dövləti onları lazımi qida, dava-dərmanla təmin edir. Əslində, Azərbaycan dövlətinin uzun müddət onun ərazilərini işğalda saxlayan, azərbaycanlılara qarşı nifrət bəsləyən, sülh və sabitliyə qarşı çıxan Ermənistana və ermənilərə münasibəti bütün dünya dövlətləri üçün nümunə olmalıdır. Bizim yerimizdə Fransa, Almaniya, ABŞ kimi ölkələr olsaydı, daha sərt və amansız addımlar atardı”, - deyə R.Alıyev vurğulayıb.