Azərbaycanın şanlı Zəfər Günü ilə bağlı Xorvatiya mətbuatında məqalə dərc edilib
Bakı, 9 noyabr, AZƏRTAC
8 Noyabr - Zəfər Günü münasibəti ilə Xorvatiyanın nüfuzlu mətbuat orqanında məqalə dərc olunub.
AZƏRTAC xəbər verir ki, “Azərbaycanın böyük qələbəsi Cənubi Qafqaza inkişaf və sülh gətirdi” sərlövhəli məqalədə ölkəmizin öz ərazi bütövlüyünü bərpa etməsindən və regionda yeni reallıq yaratmasından bəhs olunur. Məqalənin müəllifi Milli Məclisin deputatı, Azərbaycan-Xorvatiya parlamentlərarası İşçi Qrupunun rəhbəri Könül Nurullayeva işğalçı Ermənistanın uzun müddət Azərbaycana qarşı apardığı işğalçılıq siyasətindən bəhs edir. Bildirilir ki, beynəlxalq münasibətlərdə müşahidə edilən ikili standartlardan istifadə edən düşmənin işğalçılıq siyasətinə 2020-ci ildə Qələbə ilə son qoyuldu.
Ermənistanın həm öz ərazisində, həm də işğal etdiyi torpaqlarda azərbaycanlılara qarşı etnik təmizləmə siyasəti həyata keçirdiyini xatırladan deputat yazır: “1992-ci ilin fevralında ermənilər Xocalıda 106-sı qadın və 63-ü uşaq olmaqla 613 nəfər azərbaycanlını etnik mənsubiyyətinə görə qətlə yetirərək soyqırımı törətdi. Bir milyondan artıq azərbaycanlı qaçqın və məcburi köçkün həyatı yaşamağa məcbur oldu. 1993-cü ildə BMT Təhlükəsizlik Şurası tərəfindən qəbul edilən və Ermənistan qoşunlarının Azərbaycanın işğal edilmiş ərazilərindən dərhal, tam və qeyd-şərtsiz çıxarılmasını tələb edən dörd qətnamə 27 il ərzində icra edilmədi. Ermənistan istər işğal siyasətinə görə, istərsə də BMT qətnamələrini icra etmədiyi üçün cəzalandırılmadır. Bu müddətdə ermənilər Azərbaycan xalqının mədəni və dini irsinə qarşı da terror törədib”.
Məqalədə 1994-cü ilin may ayından etibarən münaqişə tərəfləri arasında atəşkəs razılaşmasına rəğmən Ermənistanın o vaxtkı təmas xəttində və sərhəddə intensiv şəkildə təxribatlar törətdiyi xatırladılır. 2020-ci il sentyabr ayının 27-də Ermənistanın Azərbaycana qarşı irimiqyaslı hərbi təxribata başladığı vurğulanır: “Azərbaycanın döyüş bölgəsinə yaxın ərazilərdə yerləşən Tərtər və digər şəhərləri 44 gün ərzində Ermənistan silahlı qüvvələri tərəfindən ağır artilleriya atəşinə məruz qaldı. Ermənistan döyüş bölgəsindən uzaqda yerləşən Gəncə, Bərdə, Mingəçevir, Qəbələ, Siyəzən və digər şəhərlərə qarşı ballistik raketlərdən istifadə etdi. Azərbaycanlı mülki əhali arasında böyük sayda insan itkisinə səbəb olmaq məqsədilə ağır artilleriya, qadağan olunmuş silahlardan, ağ fosfor və kasetli sursatlardan istifadə etdi. Nəticədə 11-i uşaq olmaqla 94 mülki şəxs qətlə yetirildi, 400-dən artıq insan yaralandı. Ermənistan Silahlı Qüvvələrinin təxribatlarına cavab vermək təbii ki, Azərbaycanın suveren hüququ idi. Elə bu təxribatlara cavab olaraq əks-hücum əməliyyatına başlayan Azərbaycan Ordusu 44 gün ərzində 30 illik işğala son qoydu”.
Azərbaycanın döyüş meydanında öz tarixi torpaqları uğrunda ləyaqətlə mübarizə apardığını qeyd edən deputat bildirib ki, müharibədə qarşı tərəfin yalnız hərbi hədəfləri zərərsizləşdirildi, mülki əhali, yaşayış məntəqələri hədəfə alınmadı.
Hərbi əməliyyatlar zamanı Azərbaycanın qazandığı uğurlar işğalçını təslim olmağa məcbur etdi. Azərbaycan və Rusiya prezidentləri və Ermənistanın baş naziri tərəfindən 2020-ci il noyabrın 10-da üçtərəfli Bəyanatın imzalanması nəticəsində Azərbaycanın işğal altında olan digər əraziləri də azad edildi.
Məqalədə qeyd olunur ki, bu gün Cənubi Qafqaz regionunda yeni reallıq yaranıb. Bu reallığı Azərbaycan yaradıb. İşğaldan azad olunmuş ərazilərdə bərpa-quruculuq işləri aparan Azərbaycan regionda Ermənistanın da iştirakı ilə geniş əməkdaşlıq mühitinin yaradılmasında maraqlıdır: “Müharibənin başa çatmasından ötən 1 il ərzində işğaldan azad olunan Qarabağ və Şərqi Zəngəzur bölgəsində irimiqyaslı bərpa-quruculuq işləri aparılır. Cəmi 8 aya inşa olunan beynəlxalq statuslu Füzuli Hava Limanı Qarabağın hava qapısıdır və artıq öz sərnişinlərini qəbul edir. Hazırda daha 2 hava limanı inşa olunmaqdadır. 4 şəhərin baş planı hazırlanıb, smart şəhər və kəndlər salınır. Azərbaycan bu işlərin hər birini öz maliyyə vəsaiti hesabına həyata keçirir”.
K.Nurullayeva yazır ki, Ermənistan işğal dövründə minaladığı ərazilərin xəritəsini verməməklə bərpa prosesinə mane olmağa çalışır. Belə ki, Ermənistanın bu vaxta qədər təqdim etdiyi mina xəritələrinin dəqiqliyi cəmi 25 faiz təşkil edir. Bu məsələdə də ciddi təzyiqlər olmalı, bölgənin rifahı üçün Ermənistan minalı ərazilərin xəritəsini təqdim etməyə məcbur edilməlidir.
Bölmənin digər xəbərləri
