Azərbaycanın Şuşa şəhəri ilə qardaşlaşmış Macarıstanın Dyöndyöş şəhərinin nümayəndə heyəti ölkəmizdə səfərdədir
Bakı, 2 noyabr (AZƏRTAC). Azərbaycanın Ermənistan tərəfindən işğal edilmiş Şuşa şəhəri ilə qardaşlaşmış Macarıstanın Dyöndyöş şəhərinin nümayəndə heyəti ölkəmizdə səfərdədir.
AZƏRTAC xəbər verir ki, şəhərin meri Laslo Faraqonun rəhbərlik etdiyi nümayəndə heyətinin tərkibinə yerli biznes nümayəndələri, mədəniyyət xadimləri və jurnalistlər daxildir. Beş günlük səfər çərçivəsində qonaqlar Şuşa Şəhər İcra Hakimiyyətinin rəhbərliyi və əslən Şuşadan olan tanınmış insanlarla görüşəcək, ölkəmizin müxtəlif guşələrinə səpələnmiş şuşalı məcburi köçkünlərin yaşayış şəraiti ilə tanış olacaqlar.
Xatırladaq ki, bu il mayın 9-da Şuşa ilə qardaşlaşma haqqında sazişin imzalanmasından sonra Dyöndyöş şəhərinin rəhbərliyi Macarıstandakı erməni icmasının güclü təzyiqi ilə üzləşmişdi. Hazırda Dyöndyöş şəhər muzeyində daimi fəaliyyət göstərəcək Şuşa ekspozisiyasının yaradılması üzərində iş gedir. Eyni zamanda, Şuşadan olan məcburi köçkünlərin Dyöndyöş Aqrar Universitetində təhsil almaq imkanları da nəzərdən keçirilir.
Pərvanə Qarayeva
AZƏRTAC-ın xüsusi müxbiri
Bölmənin digər xəbərləri
