Azərbaycanın ticarət nümayəndəsi Rusiya XİN-in döş nişanı ilə təltif edilib
Moskva, 11 aprel, AZƏRTAC
Azərbaycanın Rusiyadakı ticarət nümayəndəsi Ruslan Əliyev Rusiya Federasiyası Xarici İşlər Nazirliyinin “Qarşılıqlı fəaliyyətə görə” döş nişanı ilə təltif edilib.
AZƏRTAC xəbər verir ki, RF-nin xarici işlər naziri Sergey Lavrovun 27 mart 2023-cü il tarixli Əmrinə əsasən, Azərbaycanın Rusiyada ticarət nümayəndəsi Ruslan Əliyev Rusiya və Azərbaycan arasında ikitərəfli ticarət-iqtisadi əlaqələrin möhkəmlənməsinə verdiyi mühüm töhfəyə görə Rusiya Federasiyası Xarici İşlər Nazirliyinin “Qarşılıqlı fəaliyyətə görə” döş nişanı ilə təltif edilib.
Ruslan Əliyev MDBMİ-ni bitirib, Azərbaycan XİN-də, SOCAR-da çalışıb, “Atəşgah” birgə Rusiya-Azərbaycan sığorta şirkəti Direktorlar Şurasının sədridir. O, həmçinin MDBMİ-nin Dayanıqlı İnkişaf Mərkəzi və Beynəlxalq təbiətdən istifadə və ekologiya üzrə kompleks problemlər kafedrasının təsisçisidir. R.Əliyev MDBMİ-nin “Xidmətlərə görə” ordeninə layiq görülüb.
Azərbaycan Prezidenti İlham Əliyevin 2017-ci ildə imzaladığı Fərmanla Ruslan Əliyevə 2-ci dərəcəli fövqəladə və səlahiyyətli elçi ranqı verilib və o, RF-də ölkəmizin ilk ticarət nümayəndəsi təyin edilib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
