Bakı, 10 sentyabr, AZƏRTAC

Müasir beynəlxalq münasibətlər sistemində etibarlı tərəfdaşlar qlobal sabitliyin və inkişafın təmin olunmasında mühüm rol oynayırlar. Davamlı iqtisadi inkişaf, regional təhlükəsizlik və qarşılıqlı faydalı əməkdaşlıq üçün dövlətlərin bir-birinə etimadı zəruridir. Bu baxımdan Azərbaycan dünyada özünü etibarlı tərəfdaş kimi təsdiqləyib. Azərbaycan Prezidenti İlham Əliyevin düşünülmüş və prinsipial xarici siyasəti nəticəsində ölkəmiz beynəlxalq arenada həm iqtisadi, həm də siyasi cəhətdən mühüm mövqeyə sahib olub. Bu gün Azərbaycan öz strateji mövqeyi, enerji siyasəti və regional liderliyi sayəsində beynəlxalq ictimaiyyət tərəfindən etibarlı, sadiq tərəfdaş kimi qəbul olunur. Məhz bu səbəbdən Qərb özü üçün taleyüklü problemlərin həllində Azərbaycanı bir nömrəli tərəfdaş kimi tanıyır, onu qlobal layihələrdə iştiraka dəvət edir. Belə layihələrdən biri də Azərbaycanın Ukrayna ərazisindən Avropa İttifaqına qaz nəqli ilə bağlıdır.

Bu fikirləri AZƏRTAC-a açıqlamasında Siyasi Texnologiyalar Mərkəzinin prezidenti Vəli Əlibəyov söyləyib.

Politoloq qaz nəqli layihəsi mövzusunda müzakirələrin və təkliflərin geniş siyasi, iqtisadi maraqlarla bağlı olduğunu bildirib. Qeyd edib ki, Avropa İttifaqı 2025-ci ildə Rusiya qazından tamamilə imtina etməyə çalışır və bu məqsədlə Azərbaycan kimi enerji resurslarına malik ölkələrlə daha yaxın əməkdaşlıq qurmağa can atır. Bu da Azərbaycanın enerji siyasətində onun strateji əhəmiyyətini artırmaqla yanaşı, Bakının öz maraqlarını qorumağa yönələn mürəkkəb danışıqlar prosesini ön plana çıxarır.

“Azərbaycan Prezidenti İlham Əliyevin Beynəlxalq Çernobbio Forumundakı çıxışında səsləndirdiyi fikirlər ölkənin təbii qazla bağlı siyasətindəki uğurlu addımlarını, beynəlxalq enerji təhlükəsizliyində oynadığı mühüm rolu bir daha diqqət mərkəzinə gətirir. Dövlətimizin başçısının da qeyd etdiyi kimi, Azərbaycanın enerji strategiyası uzunmüddətli və mərhələli şəkildə həyata keçirilir, bu da ölkənin Avropa bazarında və daha geniş coğrafiyada etibarlı təchizatçı kimi qəbul olunmasını təmin edir. Prezident İlham Əliyev Azərbaycanın dünya səviyyəsində enerji siyasətində qazandığı nailiyyətləri, müstəqil dövlət kimi qəbul etdiyi strateji qərarları, eləcə də Avropa İttifaqı ilə enerji sahəsində strateji tərəfdaşlıq haqqında anlaşmanın vacibliyini xüsusi vurğulayır”, - deyə politoloq diqqətə çatdırıb.

V. Əlibəyov vurğulayıb ki, Azərbaycanın Rusiya ilə Ukrayna arasında qaz məsələsində vasitəçilik roluna dair müzakirələr fonunda ölkənin həm regionda, həm də beynəlxalq arenada diplomatik balansı qoruyaraq etibarlı tərəfdaş kimi qəbul olunması Prezident İlham Əliyevin diplomatik məharətinin göstəricisidir. O bildirib ki, bu gün Azərbaycan həm Ukrayna, həm Rusiya, həm də Avropa İttifaqı tərəfindən etibar edilən, sabit tərəfdaş kimi qəbul olunur.

“Azərbaycan Avropa İttifaqının və digər dövlətlərin enerjiyə tələbatını ödəmək üçün mövcud infrastrukturunu genişləndirir və enerji təchizatının davamlılığının təmin olunması üçün vacib qərarlar qəbul edir. Beləliklə, Prezident İlham Əliyevin rəhbərliyi ilə Azərbaycanın təbii qaz məsələsində vasitəçilik və enerji təchizatında strateji rolunun tanınması onun ardıcıl və proqnozlaşdırılabilən siyasət yürütməsinin nəticəsidir. Azərbaycanın bu sahədəki etibarı həm Avropa, həm də qonşu dövlətlər tərəfindən yüksək qiymətləndirilir və ölkəmizin həm regionda, həm də beynəlxalq arenada əhəmiyyətli oyunçu kimi mövqeyini gücləndirir”,- deyə V.Əlibəyov vurğulayıb.