İslamabad, 10 noyabr, АZƏRTAC

Pakistan Milli Assambleyasında Azərbaycanın Zəfər Günü münasibətilə rəsmi tədbir keçirilib.

AZƏRTAC xəbər verir ki, mərasimdə Pakistan Milli Assambleyasının spiker müavini Qasım Xan Suri, Milli Assambleyada Pakistan-Azərbaycan Dostluq Qrupunun rəhbəri Murtaza Cavid Abbasi, Azərbaycan Respublikası Milli Məclsinin üzvü Mahir Abbaszadə, Türkiyənin Pakistandakı səfiri İhsan Mustafa Yurdakul və Pakistan Milli Assambleyasının üzvləri iştirak ediblər.

Azərbaycan, Pakistan və Türkiyənin Dövlət himnləri səsləndikdən sonra Azərbaycanın Pakistandakı səfiri Xəzər Fərhadov qonaqları salamlayıb və Milli Assambleyanın spiker müavininə və Milli Assambleyada Pakistan-Azərbaycan Dostluq Qrupunun rəhbərinə Zəfər Günü ilə əlaqədar təşkil etdikləri tədbirə görə təşəkkürünü bildirıb. Ermənistanın 30 ilə yaxın davam edən işğalına 44 günlük Vətən müharibəsinin son qoyduğunu deyən X.Fərhadov Azərbaycanın ərazi bütövlüyünü təmin etdiyini, bir milyona yaxın azərbaycanlının fundamental hüquqlarının bərpa olunduğunu və ölkəmizin BMT Təhlükəsizlik Şurasının 1993-cü il tarixli müvafiq qətnamələrini təkbaşına yerinə yetirdiyini xüsusi vurğulayıb. Səfir Dağlıq Qarabağ münaqişəsinin keçmişdə qaldığını, Azərbaycanda “Dağlıq Qarabağ” adlı inzibati ərazi vahidinin artıq mövcud olmadığını, Azərbaycan Respublikası Prezidentinin bu il iyulun 7-də imzaladığı sərəncamla Qarabağ və Şərqi Zəngəzur iqtisadi zonaları yaradıldığını diqqətə çatdırıb.

Səfir, həmçinin 9 noyabr tarixinin Azərbaycan Respublikasının Dövlət Bayrağı Günü olduğunu və bu günün Prezident İlham Əliyevin 2009-cu il noyabrın 17-də imzaladığı Sərəncamla təsis edildiyini bildirib.

Vətən müharibəsi dövründə Azərbaycanın haqlı mövqeyinin dost və qardaş ölkələr tərəfindən dəstəkləndiyini ifadə edən X.Fərhadov ilk gündən qardaş Türkiyə və Pakistanın güclü siyasi və mənəvi dəstəyinin olduğunu bildirib. O, Pakistan Senatının, Milli Assambleyasının Ermənistanın Azərbaycana qarşı təcavüzünü, işğalçılıq siyasətini pisləyən, ölkəmizin haqlı mövqeyini dəstəkləyən qətnamələr qəbul etdiyini deyib, Vətən müharibəsi zamanı ölkəmizə göstərilən dəstəyə görə Pakistan hökumətinə, xalqına, Senata, Milli Assambleyaya dərin təşəkkürünü bildirib. Səfir deyib ki, Azərbaycan Kəşmir məsələsinin BMT Təhlükəsizlik Şurasının qətnamələrinə uyğun olaraq həll edilməsini dəstəkləyir.

Azərbaycan və Pakistan parlamentləri arasında mövcud olan sıx əlaqələrdən söhbət açan Murtaza Cavid Abbasi iki ölkə arasında dostluq və qardaşlıq münasibətlərinin yaranmasında parlamentlərin önəmli rolunun olduğunu vurğulayıb. Qeyd edib ki, Azərbaycanın Qələbəsinin birinci ildönümünün Pakistan parlamentində qeyd olunması Azərbaycan-Pakistan əlaqələrinin yüksələn xətlə inkişaf etməsinin göstəricisidir. Ölkələrimiz və xalqlarımız arasında dostluq və qarşılıqlı etimadın daha da möhkəmlənəcəyini bildirən Murtaza Cavid Abbasi Azərbaycanı şanlı Qələbə münasibətilə təbrik edib.

Azərbaycan Milli Məclisinin üzvü Mahir Abbaszadə çıxışında Milli Məclisin sədri Sahibə Qafarovanın salamlarını və xoş arzularını tədbir iştirakçılarına çatdırıb, Azərbaycanın müstəqilliyini ilk tanıyan ölkələrdən biri kimi, Pakistanın bu illər ərzində hər zaman ölkəmizi dəstəklədiyini bildirib, bu dostluq və qardaşlıq münasibətlərinin tarixi köklərə dayandığını qeyd edib. Deputat Vətən müharibəsi zamanı Pakistanın verdiyi mənəvi və siyasi dəstəyin dostluq və qardaşlıq rəmzi olduğunu bildirib və təşəkkür edib.

İhsan Mustafa Yurdakul Azərbaycan Respublikasının torpaqlarının 20 faizinin 30 il ərzində Ermənistan tərəfindən işğal altında saxlandığını, beynəlxalq ictimaiyyətin bu haqsızlığa göz yumduğunu təəssüf hissi ilə qeyd edib.

44 günlük müharibədən bəhs edən səfir BMT Təhlükəsizlik Şurasının yerinə yetirilməyən 4 qətnaməsinin Azərbaycan Silahlı Qüvvələri tərəfindən icra edildiyini vurğulayıb, Türkiyə və Pakistanın hər zaman qardaş Azərbaycan xalqının yanında olduğunu diqqətə çatdırıb, Qələbə münasibətilə Azərbaycan Hökumətini və xalqını təbrik edib.

Qasım Xan Suri bildirib ki, Pakistan Azərbaycanın müstəqilliyini tanıyan ilk ölkələrdən biridir və bu gün Azərbaycanla Pakistan arasında bütün sahələrdə əməkdaşlıq yüksək səviyyədə inkişaf edir. İkinci Qarabağ müharibəsi zamanı ölkəmizin ərazi bütövlüyü uğrunda canından keçən igid Azərbaycan əsgər və zabitlərini dərin hörmət və ehtiramla yad edən Qasım Xan Suri torpaqların Ermənistan işğalından azad olunması münasibətilə Azərbaycan hökumətini və xalqını təbrik edib. Qasım Xan Suri Pakistanın Azərbaycanı özünə qardaş ölkə hesab etdiyini, hökümətlərarası əlaqələrlə yanaşı xalqlarımız arasında əməkdaşlığın dərinləşməsinin vacib olduğunu, beynəlxalq və regional məsələlərdə Azərbaycanın Pakistana verdiyini dəstəyin söyləyib. O, Azərbaycanın Kəşmir məsələsində dəstəyini xüsusi vurğulayıb və bu amili yüksək qiymətləndirib.

Qasım Xan Suri və Murtaza Cavid Abbasi səfir Xəzər Fərhadovu və Mahir Abbaszadəni Milli Assambleyada keçirilən sessiyaya qonaq qismində dəvət ediblər. Milli Assambleyanın sessiyasına sədrlik edən Qasım Xan Suri açılış nitqində səfirə və deputata Milli Assambleyada iştirak etdikləri üçün təşəkkürünü bildirib, Qələbə münasibətilə onlara bir daha təbrikini çatdırıb.

Sonra çıxış edən sabiq spiker Sərdar Ayaz Sadiq 8 Noyabr - Zəfər Günü ilə bağlı Azərbaycan xalqını təbrik edərək Ermənistanın 30 ilə yaxın davam edən işğalına son qoyulduğunu və tarixi torpaqların geri qaytarıldığını vurğulayıb və Kəşmir məsələsində Azərbaycanın mövqeyinə görə təşəkkürünü bildirib. Sərdar Ayaz Sadiq Azərbaycanın Qələbəsinin birinci ildönümünün Pakistan parlamentində qeyd edilməsinin ilk tarixi hadisə olduğunu diqqətə çatdırıb, Pakistan xalqının Azərbaycanın yanında olduğunu vurğulayıb.

Sessiyada iştirak edən Pakistanın xarici işlər naziri Şah Mahmud Qureyşi öz çıxışında səfiri və nümayəndə heyətini salamlayıb, Azərbaycanın həmişə Pakistanın yanında olduğunu və eyni zamanda Pakistanın Azərbaycanı bütün məsələlərdə dəstəklədiyini vurğulayıb, Azərbaycanı şanlı Qələbə münasibətilə təbrik edib. Nazir, həmçinin Assambleya üzvlərinə bildirib ki, Pakistan və Türkiyə bayraqları müharibə zamanı Ermənistan işğalından azad edilmiş ərazilərdə dalğalanıb. Şah Mahmud Qureyşi Azərbaycana Kəşmir üzrə kontakt qrupunun üzvü kimi həmişə Pakistanı dəstəklədiyi üçün təşəkkür edib, Pakistan xalqının həmişə Azərbaycan xalqının yanında olduğunu bildirib.

Qulu Kəngərli

AZƏRTAC-ın xüsusi müxbiri

İslamabad