Azərbaycanla Belçika vəkilləri arasında təcrübə mübadiləsi müzakirə olunub
Bakı, 23 iyun, AZƏRTAC
Azərbaycan Respublikası Vəkillər Kollegiyasının (ARVK) sədri Anar Bağırovun başçılıq etdiyi nümayəndə heyəti Belçika Krallığının paytaxtı Brüssel şəhərində olub.
Bu barədə AZƏRTAC-a ARVK-nin mətbuat xidmətindən məlumat verilib.
Əvvəlcə Brüssel Vəkillər Kollegiyasının Niderland dilli bölməsinin prezidenti Bernard Derveaux ilə görüş keçirilib. Görüşdə Azərbaycan-Belçika vəkilləri arasında əməkdaşlıq, təcrübə mübadiləsi, vəkillər üçün təlimlər, konfransların keçirilməsi məsələsi müzakirə olunub. ARVK ilə əməkdaşlığı yüksək qiymətləndirən Bernard Derveaux görüşdə səsləndirilən təkliflərin reallaşması istiqamətində birgə fəaliyyətin əhəmiyyətini vurğulayıb. Görüşdə, həmçinin qarşılıqlı maraq doğuran məsələlər ətrafında fikir mübadiləsi aparılıb.
Sonra nümayəndə heyəti Avropa Vəkillər Assosiasiyasının (AEA-EAL) illik ümumi yığıncağında iştirak edib. Ümumi yığıncağı giriş sözü ilə açan AEA-EAL-in prezidenti Maria Slazak iclas iştirakçılarına təşkilatın 2022-ci il üzrə olan fəaliyyəti barədə məlumat verib. İclas çərçivəsində təşkilatın fəaliyyət planının təqdimatı və müzakirəsi ilə bağlı çıxışlar edilib, habelə bu günə qədər AEA-EAL tərəfindən görülən işlər və gələcəkdə planlaşdırılan işlər barədə geniş məlumat verilib.
Löven Katolik Universiteti (KU Leuven) hüquq fakültəsinin rəhbərliyi ilə ARVK nümayəndə heyəti arasında hüquq təhsili və təcrübəsinin sıx inteqrasiyasının təmin edilməsi, vəkillərin peşə fəaliyyətinin yaxşılaşdırılması məqsədilə qarşıdakı dönəm üçün əməkdaşlıq perspektivlərinin müzakirəsi aparılıb. Hər iki qurum arasında yaxın vaxtlarda birgə təşkil edilməsi planlaşdırılan layihələr barədə ilkin razılığa gəlinib.
Nümayəndə heyəti, həmçinin Avropa Vəkillər Kollegiyaları və Hüquq Cəmiyyətləri Şurasının (CCBE) baş ofisini ziyarət edib. CCBE-nin Baş katibi Simone Cuomo görüşdən məmnunluğunu ifadə edərək, ARVK ilə sıx əməkdaşlığın insan hüquq və azadlıqlarının etibarlı müdafiəsində böyük rol oynadığını diqqətə çatdırıb.
Sonra Avropa Parlamentində görüş keçirilib. Görüş çərçivəsində qarşılıqlı maraq doğuran digər məsələlər müzakirə edilib.
Eyni zamanda, Avropa İttifaqı Avropa Xarici Fəaliyyət Xidmətinin İnsan Hüquqları üzrə işçi qrupunun sədri Drahoslav Stefanek ilə görüş keçirilib, gələcəkdə birgə layihələrin reallaşdırılması ilə bağlı fəaliyyətin təşkili üçün korrespondensiyanın başlanması razılaşdırılıb.
Sonra nümayəndə heyəti “Pravolex” vəkil bürosunun rəhbərləri, Brüssel Vəkillər Kollegiyasının üzvləri Anna Sussarova və Anna Kolesnikova ilə görüşüblər. Görüşdə vəkillik fəaliyyətinə dair məsələlər müzakirə olunub.
Bölmənin digər xəbərləri
